நாயின் மோப்ப சக்தியால் கொரோனா வைரஸ் தொற்று நோயாளிகளை கண்டுபிடிக்கும் திட்டம் தொடங்கியது…!

உலகம் முழுவதும் மக்களின் உயிரை குடிக்கும் கொரோனா வைரஸ் வேகமாக பரவிவருகிறது.

இந்த வைரஸ் பாதிப்பை கண்டுபிடிக்கும் பரிசோதனைக்கான கருவிகளை தயாரித்தல், பயன்படுத்தல் என்பது செலவு நிறைந்ததாகவும் உள்ளது. மேலும், இந்த சோதனை மேற்கொள்ளப்படாதவர்களிடம் இருந்து மற்றவர்களுக்கு எளிதாக பரவும் அபாயமும் இருக்கிறது. உலகம் முழுவதும் கொரோனா வைரஸ் தொற்றினால் பாதிக்கப்பட்டு அதற்கான அறிகுறிகள் தென்படாமல் சுற்றுபவர்களால்தான் அதிகமான பேருக்கு வைரஸ் பரவல் அதிகமாகியுள்ளது.

இந்நிலையில் நாயின் மோப்ப சக்தியால் கொரோனா வைரஸ் தொற்று நோயாளிகளை கண்டுபிடிக்கும் திட்டம் ஒன்றை இங்கிலாந்து தொடங்கி உள்ளது.

இங்கிலாந்து நாட்டில் கடந்த 2008-ம் ஆண்டு நோயாளியின் உடலில் உருவாகும் வியர்வை வாசத்தை வைத்து அந்நோய் எத்தனை பேரை தாக்கியிருக்கிறது என்பதை கண்டுபிடிக்கும் வகையில் மெடிக்கல் டிடெக்ஸன் டாக் என்ற பிரிவு உருவாக்கப்பட்டது. மில்டன் நகரில் உருவாக்கப்பட்ட இப்பிரிவு கொரோனா வைரஸ் தொற்று காலத்தில் கவனம் பெற்று உள்ளது.

துர்ஹாம் பல்கலைக்கழகம், மெடிக்கல் டிடெக்ஸன் டாக் அமைப்பு மற்றும் லண்டன் ஸ்கூல் ஆஃப் ஹைஜின் அண்ட் ட்ராபிகல் மெடிசன் இணைந்து இப் பரிசோதனையை தொடங்கி உள்ளது. இதற்காக இங்கிலாந்து அரசு சார்பில் 5 லட்சம் பவுண்டுகள் ( இந்திய மதிப்பில் 4.59 கோடி ரூபாய்) நிதியுதவி வழங்கப்பட்டு உள்ளன.

மில்டல் கெய்னஸ் நகரில் இருக்கும் நாய்கள் காப்பகத்தில் கொரோனா வைரசினால் பாதிக்கப்பட்டவர்களை எப்படி அடையாளம் கண்டுபிடிப்பது என்பது குறித்து நாய்களுக்கு கடந்த மாதம் பயிற்சி நாய்களுக்கு அளிக்கப்பட்டுள்ளது. இம்முறையில் மனித உடலில் இருந்து வெளியேறும் வியர்வை வாசத்தை அடிப்படையாக வைத்து அதே வாசம் வரும் மற்ற நபர்களை, எந்த விதமான பரிசோதனையும் இன்றி நாய்கள் தனது மோப்ப சக்தியால் உணர்ந்துகொள்ளும்.

ஏற்கனவே, நாய்கள் மூலம் புற்றுநோய், பார்க்கின்ஸன் நோய், பாக்டீரியா தொற்று போன்றவை வெற்றிகரமாக கண்டுபிடிக்கப்பட்டு உள்ளன என தெரிவிக்கப்படுகிறது.

கொரோனா வைரஸ் நோயாளிகளை அடையாளம் காணும் இவ்விவகாரத்தில் முதல் கட்டமாக பரிசோதனையில் ஈடுபடுத்தப்படும் நாய்கள், மனிதர்கள் உடலிலிருந்து வெளியேறும் வியர்வை வாசத்தின் மூலம் கொரோனாவை கண்டறிய முடியுமா…? என்பது குறித்து சோதனை நடக்கும். சோதனைக்காக லண்டன் சுகாதாரத்துறை கொரோனா வைரசால் பாதிக்கப்பட்ட நோயாளிகளின் உடலில் இருந்து வியர்வை வாசத்தின் மாதிரிகளையும், வியர்வை மாதிரிகளையும் சேகரித்து வைத்து உள்ளனர். இப் பரிசோதனை வெற்றிகரமாக அமைந்தால் ஒருமணி நேரத்துக்கு 250 பேரை கொரோனா வைரசால் பாதிக்கப்பட்டுள்ளார்களா…? எனக் கண்டறிய முடியும் என நம்பப்படுகிறது.

இதுபற்றி அந்நாட்டு அமைச்சர் லார்ட் பெத்தல் பேசுகையில், இதற்கு முன்னரே இந்த மெடிக்கல் டிடெக்ஸன் நாய்கள் பல்வேறு நோய்களை கண்டுபிடித்து உள்ளன. இனவே, இப்போது கொரோனா வைரஸ் விவகாரத்திலும் பயன்படுத்துகிறோம். இந்த முயற்சியின் மூலம் விரைவில் முடிவுகள் கிடைக்கும் என்ற நம்பிக்கையிருக்கிறது. இப்பரிசோதனையில் துல்லியத்தன்மை மிகவும் முக்கியமான ஒன்றாகும்.

ஒருவேளை நாய்கள் துல்லியத்தன்மையோடு கண்டுபிடித்தால் எதிர்காலத்தில் கொரோனா பரவுவது விரைவில் கட்டுப்படுத்தப்படும். இச்சோதனையில் லேப்ரடார் வகை நாய்கள், காக்கர் ஸ்பானியல்ஸ் வகை நாய்கள் என மொத்தம் 6 நாய்கள் பயன்படுத்தப்பட உள்ளன. இதற்கான பயிற்சி முடிந்தபின் கொரோனா வைரஸ் தொற்று அறிகுறி இல்லாமல் அந்த வைரசால் பாதிக்கப்பட்டவர்களை கூட நாய்களால் கண்டறிய முடியும்” எனக் குறிப்பிட்டுள்ளார்.

லண்டன் ஸ்கூல் ஆஃப் ஹைஜின் அண்ட் ட்ராபிகல் மருத்துவ பிரிவின் தலைவர் ஜேம்ஸ் லோகன் கூறுகையில், “நாய்களின் கூர்மையான மோப்ப சக்தியால் எளிமையாக உச்சபட்ச துல்லிய தன்மையுடன் நோயாளிகளை கண்டுபிடிக்க முடியும். இதற்கு முன்னரே மலேரியா, புற்றுநோய் போன்ற நோய்களை நாய்கள் கண்டறிந்து உள்ளன. எனவே, கொரோனா வைரஸ் நோயாளிகளை எளிதில் அடையாளம் காண இந்த முயற்சி முக்கிய மைல்கல்லாக அமையும். கொரோனா வைரஸ் தொற்று நோய் சுவாசம் தொடர்பான நோயாகும். எனவே, சுவாசம் தொடர்பான நோய் ஒருவரை தாக்கும்போது அவரின் உடலின் வியர்வையின் வாசம் மாறக்கூடும் என்பதால் நாய்கள் பயன்படுத்தப்படுகின்றன” எனத் தெரிவித்து உள்ளார்.

Next Post

சென்னையில் கொரோனா வைரஸ் பாதிப்பு 6 ஆயிரத்தை தாண்டியது...

Sun May 17 , 2020
தமிழகத்தில் கொரோனாவினால் பாதிக்கப்படுபவர்கள் எண்ணிக்கை உயர்ந்த வண்ணம் உள்ளது. தலைநகர் சென்னையில் அதிகப்படியான பாதிப்புக்கள் பதிவாகிவருகிறது. நேற்று (மே 16) தமிழக சுகாதாரத்துறை வெளியிட்ட செய்திக்குறிப்பில், தமிழகத்தில் நேற்று 477 பேருக்கு கொரோனா பாதிப்பு இருப்பது தெரியவந்துள்ளது. மாநிலத்தில் இதுவரை 10 ஆயிரத்து 585 பேர் கொரோனா நோய் தொற்றால் பாதிக்கப்பட்டு உள்ளனர். 4 ஆயிரத்து 415 பேர் மருத்துவ கண்காணிப்பில் இருந்து வருகின்றனர். நேற்றைய பாதிப்பில் சென்னையில் மட்டும் […]

அதிகம் வாசிக்கப்பட்டவை