நெல்லையில் கொரோனா பாதித்தோர் எண்ணிக்கை 200-ஐ தாண்டியது…

Read Time:3 Minute, 15 Second

மராட்டியத்தில் இருந்து நெல்லைக்கு வந்த மேலும் 12 பேருக்கு கொரோனா தொற்று உறுதி செய்யப்பட்டதை தொடர்ந்து பாதிக்கப்பட்டோர் எண்ணிக்கை 200-ஐ தாண்டி உள்ளது. இதேபோல், தூத்துக்குடி, தென்காசியில் 21 பேர் பாதிக்கப்பட்டு உள்ளனர்.

தமிழகத்தில் கொரோனாவினால் பாதிக்கப்படுபவர்கள் எண்ணிக்கை தொடர்ந்து அதிகரித்த வண்ணம் உள்ளது. கடந்த சில நாட்களாக வெளி மாநிலங்களில் இருந்து வந்தவர்கள் மூலமாகவும் பாதிப்பு எண்ணிக்கை அதிகரித்து வருகிறது. அந்த வகையில் மராட்டியத்தில் இருந்து நெல்லைக்கு வருபவர்கள் மூலம் அங்கும் கொரோனாவினால் பாதிக்கப்பட்டவர்கள் எண்ணிக்கை அதிகரிக்கிறது.

மராட்டிய மாநிலம் மும்பை, புனே உள்ளிட்ட நகரங்களில் இருந்து வருகிறவர்கள், நெல்லை மாவட்ட எல்லையான கங்கைகொண்டான் சோதனை சாவடியில் தடுத்து நிறுத்தப்பட்டு பரிசோதனை செய்யப்படுகிறது. இவ்வாறு கடந்த 2 நாட்களில் 754 பேருக்கு சோதனை நடத்தப்பட்டது. இதில் நெல்லை மாவட்டத்தில் 12 பேருக்கும், தென்காசி மாவட்டத்தில் 6 பேருக்கும் கொரோனா தொற்று மே 18-ல் உறுதி செய்யப்பட்டு உள்ளது. மாவட்டத்தில் பாதிப்புக்கு உள்ளான அனைவரும் ஐகிரவுண்டு அரசு மருத்துவமனையில் உள்ள கொரோனா சிறப்பு வார்டில் அனுமதிக்கப்பட்டனர்.

இவர்களையும் சேர்த்து நெல்லை மாவட்டத்தில் கொரோனாவால் பாதிக்கப்பட்டோர் எண்ணிக்கை நேற்று 206 ஆக உயர்ந்து உள்ளது. இதில் 64 பேர் குணமடைந்து வீடு திரும்பி உள்ளனர். ஒருவர் இறந்து விட்டார். மீதி 141 பேர் மருத்துவமனையில் சிகிச்சை பெற்று வருகிறார்கள்.

தென்காசி மாவட்டத்தில் 6 பேர் பாதிக்கப்பட்டு உள்ளனர். தென்காசி மாவட்டத்தில் கொரோனா பாதித்தோர் எண்ணிக்கை 70 ஆக உயர்ந்து உள்ளது. அதில் 40 பேர் குணமடைந்து வீடு திரும்பிய நிலையில், 30 பேருக்கு மருத்துவமனையில் சிகிச்சை அளிக்கப்பட்டு வருகிறது. இதுதவிர மும்பையில் இருந்து தினமும் ஏராளமானவர்கள் வந்து கொண்டிருக்கிறார்கள். அவர்களுக்கு சோதனை செய்யப்படுகிறது.

தூத்துக்குடி மாவட்டத்திலும் மராட்டிய மாநிலத்தில் இருந்து வந்த 14 பேருக்கு கொரோனா தொற்று உறுதி செய்யப்பட்டுள்ளது. சாத்தான்குளம் பகுதியை சேர்ந்த ஒருவர் கொரோனாவால் பாதிக்கப்பட்டு உள்ளார். இவர்களையும் சேர்த்து தூத்துக்குடி மாவட்டத்தில் கொரோனாவால் பாதிக்கப்பட்டவர்களின் எண்ணிக்கை 85 ஆக அதிகரித்துள்ளது.