முக கவசம் கட்டாயம்… பணிபுரியும் இடங்களில் எச்சில் துப்பினால் அபராதம் – மத்திய அரசு உத்தரவு

Read Time:2 Minute, 44 Second

கொரோனா பாதிப்பை தொடர்ந்து ஊரடங்கு அமல்படுத்தப்பட்டதால், கடந்த மார்ச் 25-ம் தேதி முதல் வீட்டில் இருந்து பணியாற்றுமாறு மத்திய அரசு ஊழியர்கள் கேட்டுக் கொள்ளப்பட்டனர்.

இந்நிலையில் கடந்த திங்கட்கிழமை முதல் 50 சதவீத ஊழியர்கள் அலுவலகத்துக்கு வந்து பணியாற்றுமாறு கேட்டுக் கொள்ளப்பட்டனர். ஆனால், 33 சதவீத ஊழியர்கள் தான் அலுவலகத்துக்கு வந்து இருப்பதாக தகவல் வெளியாகியது. இதனையடுத்து அனைத்து துறைகளுக்கும் மத்திய பணியாளர் நலத்துறை அமைச்சகம் உத்தரவு ஒன்றை பிறப்பித்து உள்ளது.

மத்திய அரசு வெளியிட்டுள்ள அந்த உத்தரவில், மத்திய உள்துறை அமைச்சகம் ஏற்கனவே பிறப்பித்துள்ள உத்தரவின்படி பணிபுரியும் இடங்களிலும், பொது இடங்களிலும் எச்சில் துப்புவது சட்டப்படி அபராதம் விதிக்கக்கூடிய குற்றமாகும். எனவே, மத்திய அரசு அலுவலகங்களில் எச்சில் துப்பாமல் இருப்பதை சம்பந்தப்பட்ட துறைகளின் அதிகாரிகள் உறுதியான நடவடிக்கை எடுக்க வேண்டும்.

எச்சில் துப்புபவர்களுக்கு அபராதம் விதிக்க வேண்டும் என தெரிவிக்கப்பட்டுள்ளது.

மேலும், பணிபுரியும் இடங்களிலும், பொது இடங்களிலும் அனைவரும் கட்டாயம் முகக்கவசம் அணிய வேண்டும். ஊழியர்களுக்கு உடல் வெப்ப பரிசோதனை நடத்துவதற்கும், கிருமி நாசினி கொண்டு கைகளை சுத்தப்படுத்துவதற்கும் ஏற்பாடு செய்ய வேண்டும். ஒரு ஊழியருக்கும் மற்றொரு ஊழியருக்கும் போதுமான இடைவெளி இருக்க நடவடிக்கை மேற்கொள்ள வேண்டும்.

இதேபோல் ஒரு ஷிப்டுக்கும் மற்றொரு ஷிப்டுக்கும் இடையே போதுமான நேர இடைவெளி இருக்க வேண்டும். கதவுகள், கைப்பிடிகள் உள்பட ஒட்டுமொத்த அலுவலகத்தையும் கிருமிநாசினி கொண்டு அடிக்கடி சுத்தம் செய்ய வேண்டும் எனவும் அதில் கூறப்பட்டுள்ளது.

மத்திய அரசு அலுவலகங்களிலும், தனியார் அலுவலகங்களிலும் கழிவறைக்கு செல்லும் வழி மற்றும் படிக்கட்டு பகுதிகளில், புகையிலை பொருட்களை போட்டு எச்சில் துப்பி இருப்பதை காணலாம். அப்படிப்பட்டவர்களுக்கு அபராதம் விதிக்கும் நடைமுறை பயனளிக்கும் என எதிர்பார்க்கப்படுகிறது.