ரஷியாவிடம் எஸ்-400 ஏவுகணை வாங்கும் விவகாரம்… பொருளாதார தடையை விதிப்போம் என இந்தியாவை மிரட்டி பார்க்கும் டிரம்ப் நிர்வாகம்…!

ரஷியாவிடம் இருந்து ஏவுகணைகளை வாங்குவதால், இந்தியா மீது அமெரிக்காவின் டிரம்ப் நிர்வாகம் பொருளாதார தடை விதிக்க வாய்ப்பு உள்ளதாக பரபரப்பு தகவல் வெளியாகி உள்ளது.

இந்தியாவுக்கும், ரஷியாவுக்கும் இடையே நல்லுறவு கால காலமாக நீடித்து வருகிறது. ரஷியாவிடம் இருந்து எஸ்-400 ஏவுகணைகளை வாங்குவதற்கு இந்தியா ரூ. 40 ஆயிரம் கோடி மதிப்பில் ஒப்பந்தம் மேற்கொண்டது. விரைவில் இந்த ஏவுகணை இந்தியாவிற்கு வழங்கப்படும் என ரஷியா தெரிவித்தது. இதற்கிடையே ரஷியாவிடம் இருந்து ஆயுதங்களை கொள்முதல் செய்யும் நாடுகளுக்கு கடுமையான தடைகள் விதிக்கப்படும் என்று அமெரிக்கா எச்சரித்தது.

ரஷியாவிடம் இருந்து எஸ்-400 ஏவுகணைகளை சமீபத்தில் துருக்கி வாங்கியது. ரஷியாவுடன் ஒப்பந்தம் மேற்கொண்ட காரணத்தால் துருக்கிக்கு அமெரிக்கா தயாரித்த எஃப்-35 ரக போா் விமானங்களை அமெரிக்கா விற்காது என்று டொனால்ட் டிரம்ப் தெரிவித்தாா். இதனால், ரஷியாவிடம் இருந்து ஆயுதங்களை கொள்முதல் செய்யும் இந்தியாவுக்கும் தடைகள் விதிக்கப்படுமா…? என்ற கேள்வி விடையில்லாமல் தொடர்ந்தது. இதற்கிடையே இதே நோக்கத்தில் அமெரிக்கா தயாரித்த ஏவுகணையை வாங்கலாம் என இந்தியாவுக்கு யோசனையும் கூறியது.

ஆனால் ரஷியாவிடம் இருந்து 5 பில்லியன் டாலர் (சுமார் ரூ.37 ஆயிரத்து 500 கோடி) மதிப்பிலான எஸ்.400 அதிநவீன வான்பாதுகாப்பு ஏவுகணைகளை வாங்குவதில் இந்தியா தீவிரமாக உள்ளது. ரஷியாவிடம் இருந்து இந்த ஏவுகணைகளை இந்தியா வாங்குவது அமெரிக்காவுக்கு பிடிக்கவில்லை. எனவே, ரஷியாவிடம் இருந்து நீங்கள் ஏவுகணை வாங்கினால், பொருளாதார தடை விதிப்போம் என அமெரிக்கா மிரட்டி வருகிறது. ஆனாலும், இந்தியா அதை கண்டுகொள்ளாமல் விட்டு விட்டது.

இதுபற்றி இந்திய வெளியுறவுத்துறை அமைச்சர் ஜெய்சங்கர் 2019 அக்டோபரில் தெளிவாக பதில் அளிக்கையில், “எங்கள் நாட்டுக்கு தேவையான ராணுவ ஆயுதங்களை எந்த நாட்டிடம் இருந்து பெற வேண்டும் என்பது எங்களது இறையாண்மை சாா்ந்த உரிமையாகும். இதை எப்போதும் நாங்கள் கடைப்பிடித்து வருகிறோம். ரஷியாவிடம் இருந்து என்ன வாங்க வேண்டும்; வாங்க கூடாது என்பதை மற்ற நாடுகள் கூறுவதை நாங்கள் விரும்பவில்லை. எந்த நாட்டிடம் இருந்து எதைப் பெற வேண்டும் என்ற முடிவை சுதந்திரமாக எடுக்கும் உரிமை எங்களுக்கு இருக்கிறது. அதை மற்ற நாடுகள் புரிந்து கொள்ள வேண்டும் என்றார்.

ஏவுகணைகளை வாங்குவதற்காக ரஷியாவுக்கு இந்தியா முதல் கட்டமாக 800 மில்லியன் டாலர் (சுமார் ரூ.6,000 கோடி) தொகையை கடந்த ஆண்டு வழங்கியிருக்கிறது. இது அமெரிக்காவுக்கு மேலும் ஆத்திரத்தை ஏற்படுத்தி உள்ளது.

இந்நிலையில் இந்தியாவின் செயல் குறித்து அமெரிக்க துணை மந்திரி ஆலிஸ் வெல்ஸ் (தெற்கு மற்றும் மத்திய ஆசிய விவகாரங்கள்) பேசுகையில், அமெரிக்க பொருளாதார தடைகள் சட்டப்படி (கேட்சா) ரஷியா மீது பொருளாதார தடை விதிக்கப்பட்டு இருக்கிறது. ரஷியாவிடம் இருந்து போர் தளவாடங்கள் வாங்குகிற நாடுகள் மீது பொருளாதார தடை விதிக்க இந்த சட்டம் வழிவகை செய்கிறது. ரஷியாவிடம் இருந்து இந்தியா எஸ்.400 அதிநவீன வான்பாதுகாப்பு ஏவுகணைகளை வாங்குவதால் அந்த நாட்டின் மீது அமெரிக்கா பொருளாதார தடை விதிக்கும் வாய்ப்புகள் இருக்கிறது.

இந்தியா அதிநவீன நிலை மற்றும் மிக உயர்ந்த தொழில்நுட்ப முறைகளை பின்பற்ற நகர்கிறபோது, உண்மையில் அவர்கள் எந்த அமைப்பினுள் செயல்பட விரும்புகிறார்கள் என்பது கேள்விகுறியாக மாறும். ஒரு கட்டத்தில் இந்தியா, தொழில்நுட்பங்கள் மற்றும் தளங்களுக்கு ராணுவ ரீதியிலான உறுதிப்பாட்டை செய்ய வேண்டும். அதற்கு, எங்களிடம் சிறப்பான தொழில்நுட்பங்களும், தளவாடங்களும் இருக்கின்றன.

டொனால்டு டிரம்ப் இந்தியா சென்று வந்த பிறகு இரு தரப்பு வர்த்தகம் இப்போது 20 பில்லியன் டாலரை (சுமார் ரூ. 1½ லட்சம் கோடி) தற்போது தாண்டி உள்ளது. இந்தியாவுக்கு மேம்பட்ட பாதுகாப்பு தொழில்நுட்பங்களை வழங்குவதற்கான கொள்கையில் மாற்றம் செய்து இருக்கிறோம். அதற்கான பெருமை, தற்போதைய நிர்வாகத்துக்கு சொந்தமானது அமெரிக்க வான்பாதுகாப்பு ஏவுகணைகள் வாஷிங்டனை மட்டுமல்ல இந்தியாவையும் பாதுகாகும் திறன் கொண்டது.

21-ம் நூற்றாண்டின் அச்சுறுத்தல்களுக்கு குறிப்பாக செயற்கை நுண்ணறிவு, தன்னாட்சி சாதனங்கள் போன்றவற்றால் ஏற்படுகிற அச்சுறுத்தல்களை சந்திக்க அமெரிக்கா வேகமாக தயாராகி வருகிறது எனக் கூறியுள்ளார்.

Next Post

“எஞ்சின் கட்டுப்பாட்டை இழந்துவிட்டது...” பாகிஸ்தானில் 98 பேருடன் விபத்துக்குள்ளான விமானத்தின் விமானியின் கடைசி தகவல்...

Fri May 22 , 2020
பாகிஸ்தானின் கராச்சி நகரில் தரையிறங்க முயன்ற பாகிஸ்தான் ஏர்லைன்ஸ் நிறுவனத்தின் A320 Airbus விமானம் குடியிருப்பு பகுதியில் விழுந்து விபத்துக்குள் சிக்கியது. லாகூரில் இருந்து கராச்சியை நோக்கிய விமானம் இன்று (மே 22) பிற்பகல் 2:30 மணியளவில் கராச்சி ஜின்னா சர்வதேச விமான நிலையத்தில் தரையிறங்க முயற்சி செய்துள்ளது. விமானத்தையோட்டிய விமானி சஜ்ஜத் கவுல், விமானத்தை தரையிறக்க முயன்று மூன்று முறை வானிலேயே சுற்றியுள்ளார். அப்போது “விமானத்தின் எஞ்சின் கட்டுப்பாட்டை […]

அதிகம் வாசிக்கப்பட்டவை