சென்னையில் கொரோனா தொற்றுக்கு ஒரே நாளில் 19 பேர் உயிரிழப்பு..!

Read Time:4 Minute, 54 Second
45 Views
சென்னையில் கொரோனா தொற்றுக்கு ஒரே நாளில் 19 பேர் உயிரிழப்பு..!


சென்னையில் நேற்று (ஜூன் 6) ஒரே நாளில்  இதுவரை இல்லாத வகையில் 19 பேர் கொரோனா வைரஸ் தொற்றுக்கு பலியாகியுள்ளனர். தமிழகம் முழுவதும் வைரசினால் மொத்தமாக பாதிக்கப்பட்டவர்கள் எண்ணிக்கை 30 ஆயிரத்தை தாண்டி செல்கிறது.  

தமிழகத்தில் கொரோனா வைரஸ் தொற்று பரிசோதனை எண்ணிக்கை அதிகரிப்புக்கு ஏற்ப நோயாளிகளின் எண்ணிக்கையும் அதிகரித்து வருகிறது. 

ஜூன் மாதத்தில் மட்டும் 6 நாட்களுக்குள் 7 ஆயிரத்து 819 பேர் கொரோனா பிடியில் சிக்கி உள்ளனர் என அரசு தரப்பு தகவல்கள் தெரிவிக்கின்றன. இதில் 60 வயதுக்கு மேற்பட்ட 1,077 முதியவர்கள் பாதிக்கப்பட்டு உள்ளனர். மாநிலத்தில் கொரோனாவுக்கு உயிர் பலியும் அதிகரித்து வருகிறது. கடந்த 6 நாட்களில் மட்டுமே 78 பேர் உயிரிழந்து உள்ளனர்.

தமிழகத்தில் ஜூன் 6 கொரோனா பாதிப்பு நிலவரம் குறித்து சுகாதாரத்துறை வெளியிட்ட செய்திக்குறிப்பில், தமிழகத்தில் ஒரே நாளில் இதுவரை இல்லாத அளவுக்கு மொத்தம் 1,458 பேர் கொரோனா வைரஸ் தொற்று பாதிப்புக்கு ஆளாகி உள்ளனர் என தெரிவிக்கப்பட்டுள்ளது.

இதனால்,  வைரசால்  பாதித்தவர்களின் எண்ணிக்கை 30 ஆயிரத்து 152 ஆக அதிகரித்து இருக்கிறது. தமிழகத்தில் இதுவரை இல்லாத அளவுக்கு  ஒரே நாளில் கொரோனா வைரசுக்கு 19 பேர் பலியாகி உள்ளனர். இவர்கள் அனைவரும் சென்னையை சேர்ந்தவர்கள். இதில் சென்னையில் உள்ள தனியார் மருத்துவமனைகளில் 10 பேரும், அரசு மருத்துவமனைகளில் 9 பேரும் சிகிச்சை பலனின்றி உயிரிழந்துள்ளனர் எனவும் அரசு தெரிவித்து உள்ளது. இதன் மூலம் மாநிலத்தில் உயிரிழப்பு எண்ணிக்கை 251 ஆக அதிகரித்து உள்ளது.

தமிழக மருத்துவமனைகளில் சிகிச்சை பெற்று வந்த 633 பேர் நேற்று குணமடைந்து ‘டிஸ்சார்ஜ்’ செய்யப்பட்டுள்ளனர். இதுவரை 16 ஆயிரத்து 395 பேர் குணமடைந்து வீடு திரும்பி இருக்கின்றனர். தமிழக மருத்துவமனையில் ஜூன் 6 நிலவரப்படி கொரோனா நோய் தொற்றால் பாதிக்கப்பட்டவர்களில் 13 ஆயிரத்து 503 பேர் சிகிச்சை பெற்று வருகின்றனர்.

தமிழகத்தில் நேற்று 29 மாவட்டங்களில் புதிதாக கொரோனா வைரஸ் பாதிப்பு கண்டறியப்பட்டு உள்ளது. இந்த பட்டியலில் முதலிடத்தில் இருக்கும் சென்னையில் 1,149 பேருக்கு வைரஸ் பாதிப்பு ஏற்பட்டுள்ளது.

இதற்கு அடுத்தப்படியாக செங்கல்பட்டில் 95 பேரும், திருவள்ளூரில் 80 பேரும், காஞ்சீபுரத்தில் 16 பேரும், தூத்துக்குடியில் 14 பேரும், கன்னியாகுமரியில் 10 பேரும், கிருஷ்ணகிரியில் 8 பேரும், மதுரையில் 7 பேரும், நாகப்பட்டினம், விழுப்புரம், கரூரில் தலா 6 பேரும், அரியலூர், திண்டுக்கலில் தலா 5 பேரும், ராமநாதபுரம், திருவாரூர், விருதுநகரில் தலா 4 பேரும், திருவண்ணாமலை, சேலம், கள்ளக்குறிச்சி, கோவையில் தலா 3 பேரும், ராணிப்பேட்டை, சேலம், சிவகங்கை, தென்காசி, தஞ்சாவூர், நெல்லை, வேலூரில் தலா 2 பேரும், புதுக்கோட்டை, தர்மபுரி, கடலூர் ஆகிய மாவட்டங்களில் தலா ஒருவரும் வைரஸ் பாதிப்புக்கு ஆளாகியுள்ளனர்.  

தமிழகத்தில் புதியதாக 12 வயதுக்கு உட்பட்ட 67 குழந்தைகளும், 60 வயதுக்கு மேற்பட்ட 217 முதியவர்களும் கொரோனா வைரஸ் பாதிப்பு ஆளாகி இருக்கிறார்கள். இதுவரை 12 வயதுக்கு உட்பட்ட 1,638 குழந்தைகளும், 60 வயதுக்கு மேற்பட்ட 3 ஆயிரத்து 129 முதியவர்களும் பாதிக்கப்பட்டு உள்ளனர். 

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %