லடாக் மோதல் சம்பவம் உளவுத்துறையின் தோல்வியா…? சோனியா காந்தி கேள்வி..

Read Time:2 Minute, 2 Second

லடாக்கில் கல்வான் பள்ளத்தாக்கில் நடந்த மோதல் சம்பவம் குறித்து விவாதிப்பதற்காக, பிரதமர் மோடி காணொலி காட்சி மூலம் அனைத்துக்கட்சி கூட்டத்தை நடத்தினார். அதில், காங்கிரஸ் தலைவர் சோனியா காந்தியும் கலந்து கொண்டு மத்திய அரசு மீது சரமாரியாக கேள்விகளை எழுப்பினார்.

சோனியா பேசுகையில், கடந்த மே 5-ம் தேதி முதல் ஜூன் 6-ம் தேதிவரையில் இருந்த பொன்னான நேரத்தை மத்திய அரசு வீணாக்கி விட்டது. பதற்றத்தை தணிக்க பேச்சுவார்த்தைக்கான அனைத்து வாய்ப்புகளையும் பயன்படுத்த அரசு தவறிவிட்டது. அதனால், 20 ராணுவ வீரர்கள் பலியாகி இருக்கிறார்கள். பலர் காயமடைந்து உள்ளனர் என குற்றம் சாட்டினார்.

பின்னர், லடாக்கில் இந்திய பகுதியில் சீன ராணுவம் எப்போது ஊடுருவியது? அங்கு வழக்கத்துக்கு மாறான நிகழ்வுகள் நடப்பதாக வெளிநாடுகளில் உளவு பார்க்கும் இந்திய உளவு அமைப்புகள் தகவல் சொல்லவில்லையா? உளவுத்துறை தோல்வியால் இச்சம்பவம் ஏற்பட்டதா? அடுத்து என்ன செய்ய உத்தேசம்? என்ற கேள்விகளை எழுப்பினார். இறுதியில், எல்லைக்கோடு பகுதியில் ஏற்கனவே இருந்த நிலை ஏற்படவேண்டும் என்றும், சீன ராணுவம் தனது பழைய இடத்துக்கு திரும்பிச் செல்லும் என்றும் பிரதமரிடம் நாட்டு மக்கள் உத்தரவாதத்தை எதிர்பார்க்கிறார்கள் எனக் குறிப்பிட்டார்.

அனைத்து கட்சி கூட்டத்தை தாமதமாக கூட்டியது வருத்தமே, சீனாவை எதிர்கொள்வதில் எப்போதும் முழு ஒத்துழைப்பு நல்குவோம் என பேசியிருக்கிறார் சோனியா காந்தி.