வலுவான நிலையில் இருக்கும் இந்தியாவின் படை பலம் சீனாவை வெல்லும்… ஆய்வு முடிவு விபரம்:-

Read Time:10 Minute, 12 Second
Page Visited: 3224
வலுவான நிலையில் இருக்கும் இந்தியாவின் படை பலம் சீனாவை வெல்லும்… ஆய்வு முடிவு விபரம்:-

லடாக்கின் கிழக்கே கல்வான் பள்ளத்தாக்கு பகுதியில் சீன ராணுவம் ஊடுருவியதால் இரு நாட்டு வீரர்கள் இடையே கடந்த மாதம் 5 மற்றும் 6-ம் தேதிகளில் மோதல் நடந்தது. இதனால் ஏற்பட்ட பதற்றத்தை தணிக்க ராணுவ மேஜர் மட்டத்தில் பேச்சுவார்த்தை நடந்தது. ஆனால் இதில் உடன்பாடு ஏற்படாததால் இருநாட்டு ராணுவத்தின் லெப்டினன்ட் ஜெனரல் மட்டத்தில் கடந்த 6-ம் தேதி முதல் சுற்று பேச்சுவார்த்தை நடந்தது.

இதன் முடிவில் எல்லையில் இருந்து இருதரப்பும் படைகளை விலக்க ஒருமித்த முடிவு எடுக்கப்பட்டது. இந்த பணிகள் நடந்து கொண்டிருந்த போது தான் கடந்த 15-ம் தேதி இருதரப்பிலும் மோதல் ஏற்பட்டு இந்திய தரப்பில் 20 வீரர்களும், சீனாவில் 35 பேரும் கொல்லப்பட்டனர். இதனால் எல்லையில் பெரும் பதற்றம் நிலவி வருகிறது. ஆசிய கண்டத்தில் இந்தியாவின் வளர்ச்சியை சகித்துக்கொள்ள முடியாத சீனா, பல்வேறு இன்னல் வேலைகளை செய்கிறது. தன்னை பலம் வாய்ந்ததாக காட்டிக்கொள்கிறது.

லடாக்கில் நடைபெற்ற சண்டையில் சீன நாட்டு வீரர்கள் அதிகமாக இறந்ததை ஏற்றுக்கொள்ள முடியாது அமைதி காக்கிற்து. இது அவர்களுக்கு மானப்பிரச்சினையாகும். மேலும், இவ்விவகாரம் தொடர்பாக உள்நாட்டு மக்களின் விமர்சனங்களையும் சீன அரசு எதிர்க்கொண்டுள்ளது. இந்நிலையில் இப்போது, இந்தியாவின் படைபலம் சீனாவை வெல்லும் சர்வதேச மையம் கணித்து உள்ளது.

கடந்த 2017-ம் ஆண்டு டோக்லாமில் ஏற்பட்ட பிரச்சினையை தொடர்ந்து இந்தியாவும், சீனாவும் எல்லையில் வீரர்களை குவித்து வருகிறது. இரு நாடுகளும் சமரச பேச்சுவார்த்தை நடத்தினாலும் எல்லையில் பதற்றம் குறையமால் தொடர்கிறது. உலக அரங்கில் இந்தியா வெளிப்படைத்தன்மையுடன் செயல்படுகிறது. சீன விவகாரத்தில் இந்தியா துணிவதற்கு தனது ராணுவ நிலைப்பாட்டில் மிகுந்த நம்பிக்கை வைத்து உள்ளது தான் முக்கிய காரணமாகும்.

சீன படை பலத்தின் முன் இந்தியா சாதாரணமானது என்று ஒரு மாயை உருவாக்கப்பட்டு இருக்கிறது. இது முற்றிலும் தவறான ஒன்றாகும். ராணுவ கட்டமைப்பு, தளவாடங்கள், விமானங்கள், கப்பல்கள் என்ற ஒட்டு மொத்த கணக்கீட்டில் சீனா முன்னணியில் இருக்கிறது என்பதனை மறுக்கமுடியாது. இந்த கட்டமைப்புகள் அனைத்தும் பரந்து விரிந்த சீனாவின் எல்லையை பாதுகாக்க போதாது என்பது மறுக்க முடியாத உண்மையாகும்.

போரில் வெற்றி என்பது வீரர்கள், ஆயுதங்களின் எண்ணிக்கையில் மட்டும் கிடைத்து விடுவதில்லை. மாறாக களத்தில் செயல்படும் திறனின் அடிப்படையில் தான் அமைகிறது. அதன்படி சீனாவுடன் ஒப்பிடும் போது இந்தியாவின் திறன் மிக சிறப்பாக இருக்கிறது. இந்திய-சீன போர் ஏற்பட்டால் அதில் தரைப்படையும், விமானப்படையும் தான் முக்கிய பங்கு வகிக்கும். இரு நாடுகளிலும் கடல் வழி தாக்குதல்கள் சாத்தியம் கிடையாது.

அமெரிக்காவில் உள்ள ஹார்வர்டு கென்னடி பள்ளியின் அறிவியல் மற்றும் சர்வதேச பெல்பர் மையம் இந்தியா-சீனாவின் படை பலத்தை ஆய்வு செய்து முக்கிய தகவல்களை வெளியிட்டுள்ளது. அதில் இரு நாடுகளிலும் உள்ள படை வீரர்களின் எண்ணிக்கை, விமானங்கள் மூலம் தாக்கும் திறன் போன்றவை விரிவாக ஆராயப்பட்டு இருக்கிறது. போர் வந்தால் இந்தியாவிற்கே வெற்றி வாய்ப்பு அதிகம் என்று ஆய்வு முடிவில் தெரிவிக்கப்பட்டுள்ளது. அதற்கான காரணங்களையும் அவ்வமைப்பு பட்டியலிடப்பட்டு இருக்கிறது.

தரைப்படை

இரு நாடுகளும் சம எண்ணிக்கையில் தான் தரைப்படை வீரர்களை வைத்திருக்கிறது. ஆனால், இந்திய-சீன எல்லையில் இருக்கும் வீரர்களின் எண்ணிக்கையில் இந்தியா தான் முன்னணியில் இருக்கிறது. அதாவது சீனா தனது நாட்டை பாதுகாக்க 5 படைப்பிரிவுகளை ஏற்படுத்தி உள்ளது. அதில் இந்திய எல்லை அருகே நிலைகொண்டு இருக்கும் படை மேற்கு திடேட்டர் கமாண்டட் ஆகும். இந்த படைப்பிரிவில் இருக்கும் சீன வீரர்களின் எண்ணிக்கை வெறும் 2 லட்சத்து 30 ஆயிரம் தான் உள்ளது.

இவர்கள் மட்டுமே மலை பாங்கான அப்பகுதிகளில் போரிடும் திறனை பெற்று இருக்கிறார்கள். ஆனால், இந்தியாவை பொறுத்தவரை வடக்கு, மத்திய மற்றும் கிழக்கு பகுதிகளில் உள்ள ராணுவம் அனைத்தும் இந்திய-சீன எல்லையில் நிலைக்கொண்டு இருக்கிறது. அதாவது மொத்தம் 20 லட்சம் இந்திய வீரர்கள் இங்கு நிலைநிறுத்தப்பட்டு இருக்கிறார்கள். இவர்கள் அனைவரும் இந்திய-சீன எல்லையில் இருக்கும் இடங்களை நன்று அறிந்தவர்கள். இவர்கள் மலை பகுதிகளில் போரிடும் திறன் பெற்றவர்கள். எனவே, தரைப்படையில் இந்தியாவின் பலம் அதிகமாக உள்ளது.

விமானப்படை

சீனாவின் மேற்கு திடேட்டர் கமாண்ட் உட்பகுதியில் மொத்தம் 157 போர் விமானங்கள் உள்ளன. ஆனால், இந்தியாவிடம் இப்பகுதியில் மட்டும் 270 போர் விமானங்கள் மற்றும் நிலப்பரப்பை அழிக்கும் 68 சிறிய ரக விமானங்களும் உள்ளன. அதன்படி, விமானப்படையின் எண்ணிக்கையில் இந்த பகுதியில் இந்தியாவின் ஆதிக்கமே அதிகமாக உள்ளது. சீனாவின் ஜே-10 போர் விமானத்திற்கு இணையாக இந்தியாவில் மிராஜ் விமானங்கள் இருக்கிறது.

போர் என்று வந்தால் இரு நாடுகளும் முதலில் விமான தளங்களை குறி வைத்து தாக்குதல்களை தொடங்கும். அதன்படி இந்தியா தனது பகுதியில் உள்ள அனைத்து விமான நிலையங்களில் இருந்தும் சீனாவின் எல்லை பகுதிகளில் உள்ள அனைத்து விமான நிலையங்களையும் மிக எளிதாக தாக்கி அழிக்கும் சக்தியை கொண்டிருக்கிறது. அந்த சூழ்நிலையில் சீனாவின் உட்பகுதியில் உள்ள விமான நிலையங்களில் இருந்து இந்திய பகுதிகளை தாக்குவது சீனாவிற்கு பெரும் பிரச்சினையாக இருக்கும். ஒரு வேளை தாக்குதலை தொடங்கினால் கூட இந்தியா அதனை எளிதாக முறியடிக்கும் வாய்ப்புகள் இருக்கிறது.

ஏவுகணைகள்

சீனா இந்தியாவின் அனைத்து முக்கிய பகுதிகளையும் தாக்க வேண்டும் என்றால் 104 தாக்குதல்களை நடத்த வேண்டும். ஆனால், இந்தியாவின் 10 எண்ணிக்கையிலான அக்னி 3 ஏவுகணை மூலம் சீனாவின் அனைத்து முக்கிய பகுதிகளையும் இந்தியாவால் தாக்கலாம். அதேபோல், அக்னி-2 ஏவுகணை மூலம் மத்திய சீன பகுதி முழுவதையும் தாக்கும் திறன் கொண்டது. மிக முக்கியமாக 51 அணுகுண்டுகளை வீசும் திறன் கொண்ட ஜாக்குவார் விமானங்கள் மூலம் ஒட்டுமொத்த சீனாவின் திபெத் பகுதியை இந்தியா எளிதாக அழித்துவிட முடியும்.

இந்தியாவுடன் மோதல் ஏற்பட்டால் சீனா தனது நீளமான எல்லையில் உள்ள அனைத்து படைகளையும் ஒன்று திரட்ட வேண்டும். ஆனால், இந்தியாவிற்கு அப்படியல்ல, எளிதாக தனது படைகளை சீன எல்லையில் சேர்த்து விடலாம். ஏனென்றால் இந்தியாவின் படைகளில் அதிக சதவீதம் ஏற்கனவே சீன மற்றும் பாகிஸ்தான் எல்லைகளில் தான் நிலை நிறுத்தப்பட்டு உள்ளது. இது இந்தியாவின் மிகப்பெரிய பலமாகும். இந்தியா சீனாவை விட வலுவான நிலையில் உள்ளது என்று ஆய்வு முடிவில் தெரிவிக்கப்பட்டு இருக்கிறது.

1 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %