#CoronaVaccine இந்தியாவை உற்று நோக்கும் உலக நாடுகள்… ‘கோவாக்ஸினை’ மனிதர்களிடம் பரிசோதனை செய்ய அரசு அனுமதி வழங்கியது.!

Read Time:5 Minute, 18 Second

உலகம் முழுவதையும் கொரோனா வைரஸ் ஆட்டிப்படைக்கிறது. மனித உயிரை வேகமாக குடித்துவரும் கொரோனாவை அழிக்கும் வகையிலான மருந்து இதுவரையில் கண்டுபிடிக்கப்படவில்லை. மருந்து கண்டுபிடிக்கும் பணியில் உலக நாடுகள், பல்கலைக்கழகங்கள், மருந்து நிறுவனங்கள் தீவிரமாக இறங்கியுள்ளன.

கொரோனாவுக்கு எதிரான மருந்து கண்டுபிடிக்கும் விவகாரத்தில் உலக நாடுகள் அனைத்தையும் இந்தியாவை உற்று நோக்குகின்றன. ஏற்கனவே இயற்கை மருத்துவம் மூலமாக இந்தியா கொரோனாவின் தாக்கத்தை கட்டுப்படுத்தி வருகிறது. இந்நிலையில் கொரோனாவை அழிக்கும் வகையில் இந்தியாவில் மருந்து விரைவில் கண்டுபிடிக்கப்படலாம் என்ற எதிர்பார்ப்பு அதிகரித்து இருக்கிறது.

இந்தியாவில் முதல் கொரோனா தடுப்பு மருந்தை ஐதராபாத்தை சேர்ந்த பாரத் பயோடெக் நிறுவனம் கண்டுபிடித்து இருக்கிறது. இந்த மருந்தை மனிதர்களுக்கு செலுத்தி பரிசோதிக்கும் அனுமதியை இந்திய மருந்து கட்டுப்பாளர் அமைப்பு அந்நிறுவனத்துக்கு வழங்கியிருக்கிறது. அடுத்த மாதத்திலிருந்து இந்த பரிசோதனை தொடங்க உள்ளது.

மருந்தை விலங்குகளில் சோதனைகள் செய்த போது பாதுகாப்பானது மற்றும் சிறந்த நோயெதிர்ப்பு சக்தியை தூண்டுகிறது என்பது தெரியவந்திருக்கிறது. மருந்து தொடர்பான சோதனைகள் உலகெங்கிலும் நடைபெற்று வருகிறது. சுமார் 120 தடுப்பூசி மருந்து திட்டங்கள் பரிசோதனை நடந்து வருகின்றன. அரை டஜன் இந்திய நிறுவனங்கள் தடுப்பூசிகளை உருவாக்கும் முயற்சியில் ஈடுபட்டு உள்ளன.

கொரோனா வைரஸ் தடுப்பு மருந்தை பாரத் பயோடெக் நிறுவனம் ஐசிஎம்ஆர் மற்றும் தேசிய வைரலாஜி நிறுவனம்(என்ஐவி) ஆகியவற்றுடன் சேர்ந்து கூட்டாக கண்டுபிடித்து உள்ளது. கோவாக்ஸின் என்ற பெயரில் கண்டுபிடிக்கப்பட்டுள்ள இந்த மருந்து கொரோனாவுக்கு எதிராக உள்நாட்டிலேயே தயாரிக்கப்பட்ட முதல் தடுப்பு மருந்து என்பது குறிப்பிடத்தகக்து.

கிளிக்கல் ஆய்வுக்கு முந்தைய பரிசோதனைகள் அனைத்தையும் பாதுகாப்பாகவும், நோய் எதிர்ப்பு சக்தி எவ்வாறு இருக்கிறது எனும் பரிசோதனையும் முடித்து உள்ளது. இந்நிலையில் இரு கட்டங்களாக மனிதர்களுக்கு மருந்தை செலுத்தி பரிசோதி்க்க பாரத் பயோட் நிறுவனத்துக்கு அனுமதி வழங்கப்பட்டு உள்ளது.

இதுகுறித்து பாரத் பயோடெக் நிறுவனம் வெளியிட்ட அறிவிப்பில், கொரோனா வைரசுக்கு தடுப்பு மருந்து கண்டுபிடிக்கும் பணியில் ஐசிஎம்ஆர், என்ஐவி ஆகிய நிறுவனங்களுடன் இணைந்து பணியாற்றினோம். இப்போது, “கோவாக்ஸின்” என்ற மருந்தை கண்டுபிடித்து உள்ளோம். முற்றிலும் உள்நாட்டில் தயாரிக்கப்பட்ட இந்த தடுப்பு மருந்து பாரத் பயோடெக்கின் பிஎஸ்எல்-3 அதிநவீன பாதுகாப்பு ஆய்வகத்தில் உருவாக்கப்பட்டு உள்ளது.

கிளினிக்கல் பரிசோதனைக்கு முந்தைய ஆய்வுகள், பாதுகாப்பு மற்றும் நோய் எதிர்ப்பு சக்தி குறித்த விளக்கம் ஆகியவற்றை அளித்தபின் மனிதர்களுக்கு 2 கட்டங்களாக பரிசோதிக்க எங்களுக்கு மத்திய சுகாதாரத்துறை அமைச்சகமும், மத்திய மருந்து தரகக்கட்டுப்பாடு அமைப்பும் அனுமதி வழங்கியிருக்கிறது என தெரிவித்து உள்ளது.

2020, ஜூலை மாதத்திலிருந்து நாடுமுழுவதும் இந்த மருந்து மனிதர்களுக்கு பரிசோதிக்கும் ஆய்வு நடத்தப்படும் என்று தெரிவிக்கப்பட்டுள்ளது

இதுதொடர்பாக் பாரத் பயோடெக் நிறுவனத்தின் இயக்குநர் மருத்துவர் கிருஷ்ணா எல்லா பேசுகையில் “கொரோனா வைரசுக்கு எதிராக உள்நாட்டிலேயே கோவாக்ஸின் மருந்தை கண்டுபிடித்துள்ளோம் என்பதை பெருமையுடன் அறிவிக்கிறோம். ஐசிஎம்ஆர், என்ஐவி ஆகிய நிறுவனங்களுடன் சேர்ந்து இந்த மருந்தை தயாரித்து இருக்கிறோம். இந்த திட்டத்துக்கு மத்திய மருந்து தரக்கட்டுப்பாட்டு நிறுவனமும் அனைத்து ஆதரவையும், ஒப்புதலையும் வழங்கி இருக்கிறது. எங்கள் நிறுவனத்தின் ஆராய்ச்சி மற்றும் மேம்பாட்டுப்பிரிவு இரவு பகல் பாரமல் உழைத்து இந்த திட்டத்தை வெற்றியாக்கி உள்ளனர்” எனக் கூறியுள்ளார்.