செப்டம்பரில் மக்கள் பயன்பாட்டுக்கு வருகிறது ஆக்ஸ்போர்டு பல்கலைக்கழகத்தின் கொரோனா வைரஸ் தடுப்பூசி…! இரட்டை பாதுகாப்பு வழங்குவது எப்படி…?

Read Time:8 Minute, 8 Second
Page Visited: 489
செப்டம்பரில் மக்கள் பயன்பாட்டுக்கு வருகிறது ஆக்ஸ்போர்டு பல்கலைக்கழகத்தின் கொரோனா வைரஸ் தடுப்பூசி…! இரட்டை பாதுகாப்பு வழங்குவது எப்படி…?

உலக நாடுகளையெல்லாம் தன் பிடியில் இறுக்கி வரும் கொரோனா வைரசுக்கு எதிராக மருந்து கண்டுபிடிக்கும் பணிகளில் பல்வேறு நாடுகள், பல்கலைக்கழகங்கள், மருந்து தயாரிப்பு நிறுவனங்கள் ஈடுபட்டு உள்ளன. சில மருந்துகள் மனித சோதனைக்கு வந்து உள்ளன. இதுபோன்று இங்கிலாந்து நாட்டின் ஆக்ஸ்போர்டு பல்கலைக்கழகத்தின் ஜென்னர் இன்ஸ்டிடியூட் தடுப்பூசி மருந்து ஒன்றை உருவாக்கியிருக்கிறது.

இந்த தடுப்பூசியை மனிதர்களுக்கு செலுத்திப்பார்க்கும் சோதனையில் மிக முக்கியமான மூன்றாவது கட்டம் தொடங்கியிருக்கிறது. தடுப்பூசி பற்றி அஸ்ட்ராஜெனேகா மருந்து நிறுவனம் கூறுகையில், “மூன்றாம் கட்ட சோதனை தொடங்கி இருக்கிறது. இதில் பல்லாயிரக்கணக்கானோருக்கு தடுப்பூசி போடுகிற போது அதன் பாதுகாப்பு, நோய் எதிர்ப்புச்சக்தி அளவிடப்படும். செயல்திறனும் தெரிய வரும்” என தெரிவித்து உள்ளது.

இந்த தடுப்பூசியானது உலகின் பிற எந்த தடுப்பூசியையும் விட சிறப்பானது என இப்போது தெரிய வந்திருக்கிறது. மற்றும் நிரூபிக்கப்பட்டும் இருக்கிறது. இந்த தடுப்பூசியை உருவாக்குவதில் இங்கிலாந்து அரசும், அஸ்ட்ராஜெனேகா மருந்து நிறுவனமும் உதவிக்கரம் நீட்டி இருக்கின்றன.

இரட்டை பாதுகாப்பு

இந்த தடுப்பூசியை ஒரு முறை செலுத்திக்கொண்டவர்களை இது எப்படி பாதுகாக்கிறது என்பதை ஆய்வாளர்கள் சோதனை செய்து உள்ளனர். இதற்காக அவர்களின் ரத்த மாதிரிகளை சேகரித்து சோதித்துப்பார்த்திருக்கிறார்கள். அதில்தான் இந்த தடுப்பு மருந்தான இரட்டை பாதுகாப்பை வழங்குகிறது என்று கண்டுபிடிக்கப்பட்டுள்ளது. இது ஆய்வாளர்களுக்கு மிகுந்த மகிழ்ச்சியை ஏற்படுத்தியிருக்கிறது.

இந்த தடுப்பூசியானது வைரசுக்கு எதிராக போராட நோய் எதிர்ப்புச்சக்தியை உருவாக்கி இருப்பது மட்டுமல்லாது ‘டி செல்’களையும் உருவாக்கி இருக்கிறது என்று தெரியவந்துள்ளது. இந்த தடுப்பூசி இரட்டை பாதுகாப்பு அளிக்கக்கூடியதாக அமைகிறது என்பது மிகவும் சாதகமான அம்சமாக பார்க்கப்படுகிறது.

இந்த தடுப்பூசி நோய் எதிர்ப்புச்சக்தியை மட்டும் கொண்டிருந்தால், அந்த நோய் எதிர்ப்புச்சக்தி ஒரு கட்டத்தில் மங்கிப்போகும் நிலை ஏற்படும். ஆனால் ‘டி செல்’கள் அப்படி கிடையாது. அவை ஆண்டுக்கணக்கில் உடலில் இருக்கும் என்பது மிகவும் முக்கியமானது. இதை அந்த ஆராய்ச்சியில் ஈடுபட்டுள்ள விஞ்ஞானிகளுக்கு நெருக்கமாக உள்ள தரப்பு தெரிவித்ததாக இங்கிலாந்தில் வெளியாகிற ‘தி டெய்லி டெலகிராப்’ நாளேடு தகவல் வெளியிட்டு இருக்கிறது.

அதே நேரத்தில் இந்த தடுப்பூசி, கொரோனா வைரஸ் தொற்று நோய்க்கு எதிரான நீண்டகால நோய் எதிர்ப்புச்சக்தியை வழங்குமா…? என்பது இன்னும் நிரூபிக்கப்படவில்லை எனவும் தெரிவிக்கப்படுகிறது. ஆனால் நோய் எதிர்ப்புச்சக்தியையும், ‘டி செல்’களையும் உற்பத்தி செய்கிறது என்பது மிகுந்த நம்பிக்கை அளிக்கும் அம்சமாக இருக்கிறது. இது மக்களை பாதுகாக்கும். இதுவரை அந்த வகையில் தடுப்பூசி நன்றாகவே செயல்பட்டு வருகிறது.

இது ஒரு முக்கியமான தருணம் ஆகும். ஆனாலும் இன்னும் இதில் நீண்ட தொலைவு பயணிக்க வேண்டியதிருக்கிறது என்கின்றனர் விஞ்ஞானிகள். தடுப்பூசியால் நோய் எதிர்ப்புச்சக்தியும், ‘டி செல்’களும் உருவாகின்றன என்றது இரட்டை தற்பாதுகாப்பு என்று மற்றொரு வட்டாரம் தெரிவிக்கிறது.

செப்டம்பரில் கிடைக்கும்…

இந்த தடுப்பூசியை மனிதர்களுக்கு செலுத்திப்பார்க்க பச்சைக்கொடி காட்டிய பெர்க்‌ஷயர் ஆராய்ச்சி நெறிமுறை குழு தலைவர் டேவிட் கார்பென்டர் கூறுகையில், “ தடுப்பூசி குழு முற்றிலும் சரியான பாதையிலே செல்கிறது. இருப்பினும், யாரும் இதில் இறுதி தேதிகளை கூறிவிட முடியாது. சில நேரங்களில் தவறாக போய்விடவும் வாய்ப்புக்கள் இருக்கும். பெரிய மருந்து நிறுவனத்துடன் இணைந்து செயல்படுவதால் இந்த தடுப்பூசி செப்டம்பர் மாதம் பொது மக்களின் பயன்பாட்டுக்கு பரவலாக கிடைக்கக்கூடும். அதுவே, அவர்கள் செயல்படுகிற இலக்கு ஆகும்” என தெரிவித்து இருக்கிறார். இந்த தடுப்பூசிக்கு ‘சிஎச்ஆட்ஆக்ஸ் 1 என்கோவ்-19’ என பெயரிடப்பட்டு உள்ளது.

தடுப்பூசியை உருவாக்கியுள்ள ஆக்ஸ்போர்டு பல்கலைக்கழகத்தின் ஜென்னர் இன்ஸ்டிடியூட்டின் தடுப்பூசித்துறை பேராசிரியர் சாரா கில்பர்ட் “கொரோனா வைரஸ் தடுப்பூசி குழு, தடுப்பூசியின் பாதுகாப்பு மற்றும் நோய் எதிர்ப்புத்திறனை மதிப்பிடுவதில் கடுமையாக உழைக்கிறது. மேலும் தடுப்பூசி செயல்திறனை மதிப்பிடுவதற்கு தயாராகி வருகிறது” என தெரிவித்து இருக்கிறார்.

இந்தியாவில் உருவாக்கப்பட்டுள்ள ‘கோவேக்சின்’ தடுப்பூசி மருந்து, ‘ஜைகோவ்-டி’ மருந்து மனித பரிசோதனைக்கு வந்திருக்கிறது இதில் ‘கோவேக்சின்’ தடுப்பூசி மருந்து கொரோனா வைரஸ் திரிபுவை அடிப்படையாக கொண்டது. ‘ஜைகோவ்-டி’ பிளாஸ்மிட் டி.என்.ஏ.வை ஆதாரமாக கொண்டது. ஆனால், இங்கிலாந்தில் உருவாக்கப்பட்டுள்ள தடுப்பூசியை பொறுத்தமட்டில், இது மனித குரங்குகளில் தொற்றுநோயை ஏற்படுத்தும் ஜலதோஷத்தின் பலவீனமான பாதிப்புகளையும், கொரோனா வைரசின் ‘ஸ்பைக்’ புரதத்தையும் அடிப்படையாக கொண்டது என தகவல்கள் வெளியாகியிருக்கிறது.

இந்த தடுப்பூசி தான் கொரோனாவை தடுத்து நிறுத்த முதலில் களம் இறங்கும் என்ற நம்பிக்கையும், எதிர்பார்ப்பும் அதிகமாக இருக்கிறது.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %