இன்று 24-07-2020 ஆண்டாள் அவதரித்த ஆடிப்பூரம் திருநாள்…

Read Time:10 Minute, 45 Second
Page Visited: 375
இன்று 24-07-2020  ஆண்டாள் அவதரித்த ஆடிப்பூரம் திருநாள்…

ஆடி மாதத்தில் அனைத்து அம்மன் கோவில்களிலும் விழாக்களும், கொண்டாட்டங்களும் களை கட்டும். இவ்வாண்டு கொரோனா ஊரடங்கால் மக்கள் வீட்டிலேயே வழிபாடு செய்கிறார்கள். ஆடி மாதம் பெருமாள் ஆலயங்களில் சூடித்தந்த சுடர்க்கொடியான ஆண்டாளுக்கு சிறப்பு வழிபாடுகளும், தேரோட்டமும் நடைபெறும்.

ஆண்டாள் அவதாரம்

மாதந்தோறும் பூரம் நட்சத்திரம் வந்தாலும், ஆடியில் வரும் பூரம் ஆண்டாளின் அவதாரத்தினால் மிகவும் விசேஷமாகிறது. விஷ்ணு பக்தையாக வாழ்ந்து ‘சகலமும் அவனே’ என்று அவனுடன் ஐக்கியமானவர். ஆழ்வார்கள் வரிசையை அலங்கரித்து பெண் இனத்தின் பெருமையை உலகுக்கு உணர்த்தியவர். அவர் தோன்றிய நட்சத்திரம்தான் ‘ஆடிப்பூரம்’ ஆகும். இன்று அந்நாளாகும்.

விஷ்ணுவின் பாதம்பற்றி அவர் புகழ் பாடிய அடியவர்கள் அனைவரும் ‘ஆழ்வார்கள்’ என்று போற்றப்படுகின்றனர். அப்படிப்பட்ட பன்னிரண்டு ஆழ்வார்கள் தமிழ் மொழியில் பெருமாளை போற்றிப் பாடிய பாடல்களே ‘நாலாயிரத் திவ்யபிரபந்தம்’ என்று அழைக்கப்படுகிறது.

ஏழாம் நூற்றாண்டில், அதாவது கலியுகம் பிறந்து 98-வது நள வருடத்தின் ஆடிமாதம் வளர்பிறையில்,செவ்வாய்க்கிழமையும் பூர நட்சத்திரமும் கூடிய நன்னாளில் ஸ்ரீவில்லிபுத்தூரில் அவதரித்தவர் ஆண்டாள். பெரியாழ்வார் எனும் விஷ்ணு சித்தரால் மகாலட்சுமியின் அம்சமாக நந்தவனபூமியில் கண்டெடுக்கப்பட்ட அற்புத தெய்வீக குழந்தை ஆண்டாள்.

108 திவ்ய தேசங்களில் ஒன்றான ஸ்ரீவில்லிப்புத்தூரில் பெருமாள் அடியவரான விஷ்ணு சித்தர் உருவாக்கிய நந்தவன தோட்டத்தில், மாசற்ற துளசிசெடியின் கீழ் அழகிய பெண் குழந்தை கிடந்தது. அக்குழந்தையை பின்னாளில் பெரியாழ்வார் என்று அழைக்கப்பட்ட விஷ்ணு சித்தர் எடுத்து, கோதை என்று பெயரிட்டு வளர்த்து வந்தார். சிறு வயதிலிருந்தே கண்ணன் மீது அதீத காதல் கொண்டு எந்நேரமும் அவன் நினைவில் பாக்களைப் பாடியபடி வளர்ந்தாள்.

திருமணம்

பெரியாழ்வார் தான் வழிபடும் அரங்கனுக்கு சூட்ட நந்தவனத்தில் மலர்ந்திருக்கும் புத்தம் புதிய மலர்களை பறித்து வந்து அதனை தொடுத்து மாலையாக்கி பெருமாளுக்கு சூடுவார். அதை அவர் அறியாமல் ‘தான் நேசிக்கும் கண்ணனுக்கு அம்மாலை பொருத்தமானது தானா… ?’ என்று அறிய தன் கழுத்தில் சூடி அழகு பார்ப்பாள் ஆண்டாள்.

ஒரு நாள் இதை கண்ட பெரியாழ்வார் மனம் வருந்தி ‘தன் பெண் சூடிய மாலையையா கண்ணன் அணிந்தான்?’ என்ற கவலையில் வாடினார். அன்றிரவு அவர் கனவில் தோன்றிய கண்ணன், ‘கோதை சூடிய மாலையே தனக்கு விருப்பமானது’ என்று கூறினார். அன்று முதல் ஆண்டாள் ‘சூடிக் கொடுத்த சுடர்கொடி’யானாள்.

ஆண்டாளுக்கு திருமண ஏற்பாடுகள் செய்ய அவளோ ‘நான் கண்ணனையே மணப்பேன்’ என்று உறுதியாக இருந்தாள். பின்னர் பிரம்ம முகூர்த்தத்தில் கண்ணனை மனதில் நினைத்து பாவை நோன்பு ஏற்று விரதம் இருக்க தொடங்கினாள். பெரியாழ்வார் என்ன செய்வதென்று அறியாமல், திருவரங்கம் அரங்கனிடம் சென்று வேண்டினார். அரங்கனோ, ‘திருமணக்கோலத்தில் மகளுடன் திருவரங்கம் வந்து சேர்’ என அருளினார்.

அதன்படி மேளதாளம் முழங்க மகளை திருவரங்கம் அழைத்து சென்றார் பெரியாழ்வார். ஸ்ரீரங்க கோவில் கருவறைக்குள் வலது காலை எடுத்து வைத்து நுழைந்த ஆண்டாளை, அரங்கநாதப் பெருமாள் தனக்குள் ஐக்கியமாக்கி கொண்டதாக வரலாறு. ஆடியில் அவதரித்த ஆண்டாள், பெருமாளை கணவனாக அடையும் உறுதியுடன் மார்கழியில் பாவை விரதம் இருந்து பாடிய பாடல்களே ‘திருப்பாவை’ ஆகும்.

ஆண்டாள் என்றாலே முத்துக்கள் பதித்து மிளிரும் அழகுமிகு சாய்ந்த கொண்டையும், அழகிய கரங்களின் மேல் வீற்றிருக்கும் கொஞ்சும் கிளியும் தான் நாம் அனைவருக்கும் நினைவிற்கு வரும்.

ஆண்டாள் கையில் உள்ள கிளி, மாதுளம் பூக்கள், மரவள்ளி இலைகள், நந்தியாவட்டை இலை, செவ்வரளி போன்றவைகளுடன் வாழை நார் கொண்டு பிரத்யேகமாக உருவாக்கப்படுகிறது.

கோதை ஆண்டாளிடம் இருந்து ரங்கனுக்கு தூது போன வியாச மகரிஷியின் மகனான சுகப்பிரம்ம மகரிஷிதான் கிளி ரூபத்தில் ஆண்டாளின் கைகளில் தவழ்வதாக ஐதீகம். பக்தர்களின் வேண்டுதலை இந்த கிளியே, ஆண்டாளிடம் கூறி நிறைவேற்றுகிறது என்ற நம்பிக்கை நிலவுகிறது. ஸ்ரீவில்லிப்புத்தூர் ஆண்டாளுக்கு அனுதினமும் சாற்றப்படும் கிளிகளை, முன்னதாகவே சொல்லிவைத்து பக்தர்கள் பெற்று கொள்ளலாம். அப்படி பெற்ற கிளியை பூஜையறையில் வைத்து வணங்கி வந்தால் நினைத்த காரியங்கள் நடக்கும் என்பது பக்தர்களின் அசைக்க முடியாத நம்பிக்கையாகும்.

மனிதர்கள் தூய பக்தியுடன் செய்யும் எந்த ஒரு செயலும், இறைவனின் கவனத்திற்கு செல்லும் என்பதற்கு ஆண்டாளே சிறந்த சாட்சியாவார்.

கண்ணனுக்காக தயார் செய்யப்பட்ட மலர் மாலையை, தான் சூடி அழகு பார்த்த ஆண்டாளின் வழியை பற்றி, இன்றளவும் ஸ்ரீவில்லிபுத்தூர் ஆண்டாள் சூடிய மாலைதான் பிரம்மோற்சவத்தின் போது திருப்பதி பெருமாளுக்கும், மதுரை சித்திரை திருவிழாவின் போது ஆற்றில் இறங்கும் கள்ளழகருக்கும் சாத்தப்படுகிறது. ஸ்ரீவில்லிபுத்தூரில் பழங்காலமாக ஆடிப்பூரத் திருவிழா வெகு சிறப்பாக நடைபெற்று வருகிறது. இப்போதும் நடைப்பெற்று வருகிறது.

திருவல்லிக்கேணி பார்த்தசாரதி கோவில்.

அங்கு நடக்கும் தேர்த் திருவிழா, இன்றும் தமிழகத்தின் இரண்டாவது பெரிய தேராக ஆண்டாளையும், ரெங்கமன்னாரையும் சுமந்து வருவது சிறப்பானதாகும். ஆண்டாள் தோன்றிய இந்நாளில் துளசியை பூஜித்து, விளக்கேற்றி வழிபட வாழ்வில் நல்ல துணை அமைவதுடன், சகல சவுபாக்கியங்களும் உண்டாகும். வாய்ப்பு கிடைத்தால் ஒருமுறை ஸ்ரீவில்லிப்புத்தூர் சென்று தனிச் சன்னிதியில் கிழக்கு பார்த்து புன்னகையுடன் அருள் புரியும் ஆண்டாளை தரிசித்து வாருங்கள்.

அம்பிகை

பூரம் நட்சத்திரத்தில் நடைப்பெறும் ஆடிப்பூரம் விழா அனைத்து வைஷ்ணவ தலங்களில் மட்டுமல்லாது மாதவனின் தங்கையாம் ஸ்ரீ ராஜ ராஜேஸ்வரி குடிகொண்டுள்ள அனைத்து அம்மன் கோவில்களிலும் வெகு விமரிசையாக கொண்டாடப்படுகிறது. இந்நாளில் தான் உமா மகேஸ்வரியும் தோன்றியதாக கூறப்படுவதுண்டு. உலக மக்களை காக்க சக்தியாக அம்பாள் உருவெடுத்தாள். இவ்வளவு சிறப்புகள் கொண்ட ஆடி மாதத்தில் வரும் பூர நாள் அம்பிகைக்கு மிகவும் உகந்த நாளாகும். தாய்மை என்பது பெண்களுக்கே உரித்தான ஒரு தனிச் சிறப்பாகும்.

உள்ளே உயிர் வளர்த்து உதிரத்தால் பால் கொடுக்க ஒரு தாயால் மட்டுமே முடியும். நம்முடைய மானிட வழக்கமான சூல் கொண்ட பெண்ணுக்கு வளைகாப்பு நடத்துவது போல் படைக்கும் அன்னையாய் இருந்தும் கன்னி என்று மறைகள் பேசும் அம்பிகைக்கு நாம் வளைகாப்பு நடத்தி கண்டு களித்திடும் நாளாகும். “வளைகாப்பு” என்ற சடங்கு கருவுற்ற பெண்களுக்கு அவரின் கணவர், பெற்றோர் உறவினர்களால் செய்யப்பெறும் ஒரு சமய சடங்காகும்.

அனேகமாக கருவுற்ற பெண்களுக்கு 5-ஆம் மாதம் வளைகாப்பு என்ற சடங்கு நிகழ்த்தப்படுகிறது. பங்குனி உத்திரத்தில் இறைவனுக்கும் இறைவிக்கும் திருமணம் நடைபெற்றதை தொடர்ந்து ஆடிப் பூரத்தில் அனைத்து அம்பாள்களுக்கும் வளைகாப்பு செய்வது மரபாகும்.

இந்த நன்நாளில் அம்பிகையையும், ஆண்டாளையும் பிரார்த்தனை செய்து நலம் பெறுவோம்.

1 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %