இந்தியாவில் 2 மற்றும் 3-ம் கட்ட பரிசோதனைக்கு அனுமதி பெற்ற கொரோனா தடுப்பூசி எது..? விளக்கம்:-

Read Time:5 Minute, 26 Second
Page Visited: 261
இந்தியாவில் 2 மற்றும் 3-ம் கட்ட பரிசோதனைக்கு அனுமதி பெற்ற கொரோனா தடுப்பூசி எது..? விளக்கம்:-

ஆட்கொல்லி நோயான கொரோனா வைரஸ் தொற்றை கட்டுப்படுத்துவதற்கான தடுப்பூசி தயாரிக்கும் முயற்சியில் உலக நாடுகள் மும்முரமாக ஈடுபட்டு உள்ளன. அமெரிக்காவின் தேசிய சுகாதார அமைப்பும், மாடர்னா நிறுவனமும் இணைந்து தயாரித்துள்ள தடுப்பூசி இறுதிக்கட்ட சோதனையில் இருக்கிறது.

இதேபோன்று இங்கிலாந்து நாட்டின் ஆக்ஸ்போர்டு பல்கலைக்கழகம், அந்நாட்டு அரசு மற்றும் அஸ்ட்ரா ஜெனேகா மருந்து நிறுவனம் ஆகியவை இணைந்து ஒரு தடுப்பூசியை உருவாக்கி இருக்கிறது. இந்த தடுப்பூசியை இந்தியாவில் தயாரிப்பதற்கு மராட்டிய மாநிலம் புனேயை சேர்ந்த இந்திய சீரம் இன்ஸ்டிடியூட் ஆக்ஸ்போர்டு பல்கலைக்கழகத்துடன் ஒப்பந்தம் செய்து இருக்கிறது.

இந்த தடுப்பூசி மருந்துக்கு இந்தியாவில் ‘கோவிஷீல்டு’ என்று பெயரிடப்பட்டு உள்ளது.

இந்த மருந்தானது கொரோனா வைரசை வீழ்த்துவதற்கான நோய் எதிர்ப்பு சக்திகளையும், டி- செல்களையும் ஒரு சேர உருவாக்குவது இரட்டை பாதுகாப்பு என விஞ்ஞானிகள் தெரிவித்து இருக்கின்றனர்.

இந்தியாவில் பரிசோதனைக்கு அனுமதி

ஆக்ஸ்போர்டு பல்கலைக்கழகத்தின் சார்பில் தென்ஆப்பிரிக்காவில் இந்த தடுப்பூசி மருந்தின் முதல் 2 கட்ட பரிசோதனைகள் முடிந்துவிட்டது. இங்கிலாந்து நாட்டில் 2-வது மற்றும் 3-வது கட்ட பரிசோதனைகள் நடைபெற்று வருகின்றன. இந்தியாவிலும் இந்த மருந்தின் 2-வது மற்றும் 3-வது கட்ட பரிசோதனையை நடத்த முடிவு செய்யப்பட்டது.

ஏற்கனவே நடைபெற்ற பரிசோதனை முடிவு மிகவும் நம்பிக்கை அளிப்பதாக இருந்ததை தொடர்ந்து, இந்தியாவில் மனிதர்களிடம் 2-வது மற்றும் 3-வது கட்ட பரிசோதனையை மேற்கொள்ள அனுமதி கோரி சீரம் இன்ஸ்டிடியூட், இந்திய மருந்து கட்டுப்பாட்டு அமைப்புக்கு விண்ணப்பித்திருந்தது.

முதல் கட்ட பரிசோதனை முடிவின் அம்சங்களை ஆய்வு செய்த நிபுணர் குழு வழங்கிய சிபாரிசுகளின் அடிப்படையில், 2-வது மற்றும் 3-வது கட்ட பரிசோதனைகளை மேற்கொள்ள சீரம் இன்ஸ்டிடியூட்டுக்கு இந்திய மருந்து கட்டுப்பாட்டு அமைப்பு அனுமதி அளித்து இருப்பதாக செய்திகள் வெளியாகியிருக்கிறது. 3-வது கட்ட பரிசோதனையை தொடங்கும் முன் சீரம் இன்ஸ்டிடியூட் தடுப்பூசியின் பாதுகாப்பு தன்மை குறித்த பாதுகாப்பு தரவு கண்காணிப்பு வாரியத்தின் மதிப்பீட்டு அறிக்கையை சீரம் இன்ஸ்டிடியூட் தாக்கல் செய்ய வேண்டும் என்றும் மத்திய அரசு அதிகாரிகள் கூறியிருக்கிறார்கள்.

எத்தனை பேருக்கு தடுப்பூசி…?

2-வது மற்றும் 3-வது கட்ட பரிசோதனைகளுக்கு அனுமதி கிடைத்ததை தொடர்ந்து, சீரம் இன்ஸ்டிடியூட் நிறுவனம் இந்தியா முழுவதும் 18 வயதுக்கு மேற்பட்ட 1,600 பேருக்கு கோவிஷீல்டு தடுப்பூசியை செலுத்தி பரிசோதிக்க இருக்கிறது என தெரியவந்து இருக்கிறது.

எங்கெல்லாம் பரிசோதனை மேற்கொள்ளப்படுகிறது…?

டெல்லியில் உள்ள எய்ம்ஸ் மருத்துவமனை, புனேயில் உள்ள பி.ஜே.மருத்துவ கல்லூரி மருத்துவமனை, விசாகப்பட்டினத்தில் உள்ள ஆந்திரா மருத்துவ கல்லூரி மருத்துவமனை, கோரக்பூரில் உள்ள நேரு மருத்துவமனை உள்ளிட்ட 12 நகரங்களில் உள்ள மருத்துவமனைகளில் இந்த சோதனை நடைபெற இருக்கிறது.

ஆய்வு எப்படி…?

பரிசோதனைக்கு உட்படுத்தப்படும் நபர்களுக்கு தடுப்பூசி செலுத்தப்பட்ட 29-வது நாளில் அடுத்த ஊசி போடப்படும் என்றும் குறிப்பிட்ட கால இடைவெளியில் தடுப்பூசியின் பாதுகாப்பு தன்மை மற்றும் நோய் எதிர்ப்பு சக்தி ஆகியவை ஆய்வு செய்யப்படும் என்றும் மத்திய அரசு வட்டாரங்கள் தெரிவித்து உள்ளன என செய்திகள் வெளியாகியிருக்கிறது.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %