‘நில்லு, அப்புறம் சொல்லு…’ கடுமையான படிப்பும், பரீட்சையும் மாற்றத்தை கொண்டு வந்துவிடாது `ஜோஹோ’ ஶ்ரீதர் வேம்பு

Read Time:10 Minute, 40 Second
Page Visited: 99
‘நில்லு, அப்புறம் சொல்லு…’ கடுமையான படிப்பும், பரீட்சையும் மாற்றத்தை கொண்டு வந்துவிடாது  `ஜோஹோ’ ஶ்ரீதர் வேம்பு

முதலில் நம்மிடம் இருக்கும் நமது தாழ்வு மனப்பான்மையை போக்கவேண்டும். நம்மால் முடியும் என்ற தன்னம்பிக்கையை நாம் வளர்த்து கொள்ளவேண்டும். நமது மொழி மற்றும் கலாச்சாரம் ஆகியவற்றின் மீது நாம் நம்பிக்கை வைத்தால்தான் நாம் அடுத்த நிலைக்கு செல்லமுடியும் என்கிறார் `ஜோஹோ’ ஶ்ரீதர் வேம்பு.

எதுவும் தெரியாமல், பணமும் இல்லாமல்' சாஃப்ட்வேர் துறையில் தொழில் தொடங்கி, மைக்ரோசாஃப்ட் போன்ற பெரிய நிறுவனங்களுக்கே போட்டியாக உயர்ந்து நிற்கிறார்ஜோஹோ’ ஸ்ரீதர் வேம்பு. வாழ்க்கையில் இரண்டு படி ஏறினால் நான்கு படிகள் சறுக்கும் ஒவ்வொருவருக்கும் இவருடைய பேச்சு மற்றும் போராட்டம் பற்றிய தகவல்கள் பெரும் உத்வேகம் அளிக்கும் என்பதில் ஐயப்பாடு கிடையாது. படிப்பு என்பது பேப்பரில் எழுதுவதினால் கிடைக்கும் மார்க்கின் அடிப்படையில் கிடையாது ‘படப்பை செயல்திறனில் காட்டுவது முக்கியம்’ என்பதில் அதிகம் நாட்டம் கொண்ட அவர், தனது நிறுவனத்திற்கான ஆள்சேர்ப்பில் இதே கொள்கையில் ஸ்திரம் காட்டுகிறார்…

எப்போதும் அவருடைய உரையாடலை யூடியூப்பில் கேட்பதில் அதிகம் நாட்டம் அதிகம்தான். செய்தித்துறையில் ஒரு செய்தியாளராக பணியாற்றியிருந்தாலும் சில கேள்விகளுக்கும், அரசியல் நகர்வுகளுக்கும், கல்வி முறை மாற்றத்திற்கும் நம்முடைய எதிர்வினை பதிலளிப்புக்கு, “ஒரு துறையில் வானளாவிய உயரத்தினை போராடி வென்றவரின் பேச்சுக்கள் அத்தனை உத்வேகங்களை கொடுக்கும்.” அதிக நாட்களாகவே தாய்மொழி கல்வி, நீட் தேர்வு ஆகியவை தொடர்பான வாக்குவாதம் முடிவில்லாமல் செல்கிறது என்னுள்… இதற்கு பதில் அளிக்கும் விதமாக `ஜோஹோ’ ஶ்ரீதர் வேம்பு அவர்களின் சமீபத்திய பேச்சு இருந்தது.

டை சென்னை TiE Chennai அமைப்பு சார்பில் நடைப்பெற்ற இணைய வழி கலந்துரையாடலில் ‘நில்லு, அப்புறம் சொல்லு’ என்ற தலைப்பில் நடைபெற்ற கலந்துரையாடலில் ஸ்ரீதர் வேம்பு பேசியிருக்கிறார். அவருடைய பேச்சில் என்னுடைய பல்வேறு முக்கியமான கேள்விகளுக்கு பதில் கிடைத்தது. அவாருடைய பேச்சின் சிறப்பு அம்சங்கள் இங்கே பார்க்கலாம்…

ஸ்ரீதர் வேம்பு பேசுகையில், இந்தியாவை பொறுத்தவரையில் தகவல் தொழில்நுட்பத்துறை வளர்ச்சி என்பது அமெரிக்காவில் மழை பெய்தால் இங்கு குடை பிடிக்கும் சூழலில்தான் உள்ளது. இதற்குக் காரணம் நமக்கு ஆங்கிலம் நன்றாக தெரியும் என்பதால்தான். ஆங்கிலம் நமக்கு தெரிவதால் நாம் அமெரிக்க அலுவலகங்களின் ‘பேக் எண்ட் ஆபீசாக’ இங்கு நாம் செயல்படுகிறோம். இதை நாம் மாற்றவேண்டும்.

ஆனால், ஆங்கிலம் தெரியாத காரணத்தால் சீனா, தென்கொரியா, தைவான் போன்ற நாடுகள் தங்கள் திறமையை காட்ட புதிய தயாரிப்பில் இறங்கியுள்ளன. ஒரு செமிகண்டக்டர் சிப் அல்லது எலக்ட்ரிக் கார் என்று ஏதாவது ஒன்றை தயாரித்தால்தான் அதை மார்க்கெட்டில் விற்கமுடியும் என்ற நிலையில் உள்ளனர். அந்த நிலைக்கு நாம் மாற வேண்டும். பல புதிய பொருட்களை நாம் இங்கு தயாரிக்கவேண்டும் என்றார்.

தாய்மொழியை நாம் இழக்க கூடாது என்ற ஸ்திரமாக உரையாற்றிய அவர், தாய்மொழிக் கல்வி என்பது மிகவும் அவசியமான ஒன்று. நான் தமிழ் மொழியில்தான் படித்தேன். இந்தியாவில் நாம் தான் நமது தாய்மொழி வேண்டாம் என்று ஒதுக்குகிறோம். தாய்மொழியை வளர்ப்பதற்கு ஒரே வழி தொழில்முனைவோர்களும் வேலைவாய்ப்புகளை வழங்குபவர்களும் தமிழில் படித்தவர்களுக்கு முன்னுரிமை அளிப்பது. அப்போதுதான் தமிழ் மொழி வளரும். நம்மைப் போன்ற பலர் கிராமங்களுக்கு வந்து தமிழில் படிக்கும் மாணவர்களுக்கு வாய்ப்புகள் வழங்கினால்தான் தமிழையும் காப்பாற்ற முடியும் நாட்டையும் வளர்ச்சி பாதைக்கு கொண்டு செல்லமுடியும்.

நாம் இதுபோன்று செய்தால் தமிழ் தானாக வளரும். கிராமப்புறங்களில் பெரும்பாலான மாணவர்கள் தமிழிலேயே படிக்கிறார்கள். அப்படி ஆங்கில வழிக்கல்வியில் படித்தால் அதில் பலருக்கு ஆங்கிலம் வருவதில்லை. இதனால் ஆங்கிலம் தெரியாவிட்டால் அவர்களால் சாப்ட்வேர் எழுதமுடியாது என்று கூறிவிட முடியாது.

அதற்கு நான் முன்னுதாரணமாக இருக்கவேண்டும் என்பதற்காக இந்த தலைப்பான ‘நில்லு, அப்புறம் சொல்லு’ என்பதற்கு ஏற்ப நான் தற்போது எனது கிராமத்திற்கு வந்து பணிகளை துவக்கி உள்ளேன். முதலில் நம்மிடம் இருக்கும் நமது தாழ்வு மனப்பான்மையை போக்கவேண்டும். நம்மால் முடியும் என்ற தன்னம்பிக்கையை நாம் வளர்த்து கொள்ளவேண்டும். நமது மொழி, கலாச்சாரம் ஆகியவற்றின் மீது நாம் நம்பிக்கை வைத்தால்தான் நாம் அடுத்த நிலைக்கு செல்லமுடியும். ஆங்கிலம் தெரியாதவர்கள்கூட சாஃப்ட்வேர் எழுத முடியும் என்பதை நிரூபித்துக்காட்டவே நான் எனது கிராமத்திற்கு வந்துள்ளேன் என்று அழுத்தமாக பதிவு செய்தார்.

விண்டோஸ், கூகுள் போன்ற சாப்ட்வேர்களை உருவாக்குவதற்கு தேவையான விஷயங்கள் இரண்டுதான். ஒன்று திறமை, மற்றொன்று நேரமும் ஆகும். இவை இரண்டும் இருந்தால் நாம் அதை சாதித்துவிடலாம். இந்தியாவை பொறுத்தவரையில் தமிழகம் அல்லது பீகாராக இருக்கட்டும். அங்குள்ள கிராமப்புற இளைஞர்களுக்கு அவர்களுக்குள்ளே இருக்கும் திறமை தெரியாது.

அவற்றை நாம் முதலில் வெளியே கொண்டு வரவேண்டும். அப்போது அவர்களின் திறமை வெளிப்படும். திறமைசாலிகளை உருவாக்குவதற்கு பணம் மட்டும் அவசியமான கிடையது; அதற்கான சிறந்த கட்டமைப்பு, திறமைகளை உருவாக்குவதற்கான சிறந்த சூழல் ஆகியவற்றை கொடுத்தால் திறமைசாலிகள் தன்னால் உருவாவார்கள். அவர்களின் திறமைகளை பயன்படுத்தி கொள்வதற்கான வாய்ப்புகளை நாம் வழங்கவேண்டும். அப்படி வழங்கினால் இங்கு படித்துவிட்டு வெளிநாடு செல்லவேண்டிய கட்டாயம் கிடையாது. நாம் படிப்பை மாணவர்களிடம் திணிக்காமல் அவர்கள் விரும்பும்படி சொல்லி தரவேண்டும் என்றார் ஸ்ரீதர் வேம்பு.

கடுமையான பாடத்திட்டங்களை நாம் மாணவர்களிடம் திணிக்கும்போது பல மாணவர்கள் படிப்பே வேண்டாம் என்று படிப்பை பாதியிலே நிறுத்தும் சூழல் உருவாகிறது. எனக்கு பரீட்சை என்பதன் மீது எல்லாம் நம்பிக்கை கிடையாது. என்னைப் பொறுத்துவரை அடிப்படையில் எழுதப், படிக்கவும் கணக்கு போடவும் தெரிந்தாலே போதுமானது. உயர்தரமான கல்வி என்று கூறி பரீட்சையை திணிப்பதில் எனக்கு உடன்பாடு கிடையாது.

‘நீட்’ போன்ற தேர்வுளிலும் எனக்கு உடன்பாடு கிடையாது. இது சரியான கல்விமுறையும் கிடையாது. இதன் காரணமாக பல குழந்தைகள் மனரீதியாகப் பாதிக்கப்படுகிறார்கள் என தன்னுடைய குரலை வழுவாக பதிவு செய்தார் ஸ்ரீதர் வேம்பு.

ஒரு நாட்டின் வளர்ச்சி என்பது அந்த நாட்டின் தாய்மொழியையும் அங்குள்ள திறமையான இளைஞர்களையும் நம்பித்தான் இருக்கிறதுது. திறமை என்பது எல்லோரிடமும் இருக்கிறது. அதை நாம் கண்டறிந்து வெளிக்கொண்டுவர வேண்டும். அதற்கான நடவடிக்கையில் தொழில் முனைவோர்கள் இறங்குதல் அவசியமாகும். கடுமையான படிப்பும் பரீட்சையும் எந்தவொரு மாற்றத்தையும் கொண்டு வந்துவிடாது என்ற அவருடைய பதிலளிப்பு அனைத்து கேள்விகளுக்கும் அருமையான, பொருந்திய பதிலாக அமைந்தது.

0 0
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %