புதுப்பொலிவுடன் ஊட்டி மலைரெயில் சோதனை ஓட்டம்..

Read Time:1 Minute, 54 Second

நீலகிரி மாவட்டம், ஊட்டி – குன்னுார் – மேட்டுப்பாளையம் இடையே இயக்கப்படும், நீலகிரி மலை ரயில் நுாற்றாண்டு பழமை வாய்ந்தது. மேட்டுப்பாளையம் – குன்னுார் இடையே, நான்கு பெட்டிகளுடனும், குன்னுார் – ஊட்டி இடையே, ஐந்து பெட்டிகளுடனும் மலை ரயில் இயக்கப் படுகிறது.

மேட்டுப்பாளையத்தில் இருந்து குன்னூர் வழியாக ஊட்டிக்கு ஒரு முறை, குன்னூர் ஊட்டி இடையே தலா 3 முறை என தினமும் மலைரெயில் இயக்கப்பட்டு வருகிறது. தற்போது கொரோனா பரவல் காரணமாக முன்பதிவு செய்பவர்கள் மட்டும் மலைரெயிலில் பயணிக்க அனுமதிக்கப்பட்டு வருகின்றனர். இந்நிலையில் சுற்றுலா பயணிகள் இயற்கை எழில் மிகுந்த காட்சிகளை கண்டு ரசிக்கும் வகையில் 4 புதிய ரெயில் பெட்டிகள் சென்னை ஐ.சி.எப்.ல் தயாரிக்கப்பட்டது. அவை அங்கிருந்து மேட்டுப்பாளையம் ரெயில் நிலையத்துக்கு கொண்டு வரப்பட்டது.

பின்னர் புதிய 4 பெட்டிகளும் பாரம்பரிய பெருமைமிக்க நீராவி என்ஜினில் இணைக்கப்பட்டு மேட்டுப்பாளையத்தில் இருந்து குன்னூர் வழியாக ஊட்டி வரை சோதனை ஓட்டம் நடத்தப்பட்டது.

இந்த புதிய பெட்டிகளில் இருபக்கவாட்டிலும் கண்ணாடிகள் பொருத்தப்பட்டு உள்ளது. இதனால், இயற்கை காட்சிகளை எளிதில் கண்டு ரசிக்க முடியும். வருகிற கோடை சீசனில் சுற்றுலா பயணிகளுக்காக அந்த 4 புதிய பெட்டிகளுடன் மலைரெயில் இயக்கப்பட உள்ளது என்று ரெயில்வே அதிகாரிகள் தெரிவித்தனர்.