சிட்டுக்குருவியின் சங்கீதம் கேட்கலாம்….

Read Time:6 Minute, 22 Second

‘கீச்… கீச்… கீச்…’ என்ற செல்ல குரலில் காலையிலேயே சங்கீதம் பாடும் சிட்டுக்குருவியை இன்று வீடுகளிலும் காணோம்.. வீதிகளிலும் காணோம்…

சென்னை போன்ற பெரும் நகரங்களில் தேடி பார்த்தாலும் கிடைக்காத அரிய இனமாக உருவெடுத்து இருக்கிறது.

நம்முடைய நாட்டைப் பொறுத்தவரையில் காகத்திற்கு அடுத்தபடியாக அனைவராலும் அறியப்பட்ட பறவையாக இருப்பது சிட்டுக்குருவி….

இதனை ‘வீட்டுக்குருவி’, ‘அடைக்கலக் குருவி’, ‘ஊர்க்குருவி’ போன்ற பெயர்களாலும் அழைக்கப்படும் பறவை.

உருவத்தில் சிறியதாகவும், இளம் சாம்பல் கலந்த பழுப்பு நிறத்திலும் காணப்படும் பறவை சிறியவர் முதல் பெரியவர் வரையில் அனைவரும் கவருகிறது…

8 செ.மீ. வரையில் வளரக்கூடிய பறவை கூம்பு வடிவ அலகினால் இரைகளை கொத்துகையில் காண்பது அத்தனை அழகு… சிட்டுக்குருவி பறவை சுமார் 27 கிராம் முதல் 40 கிராம் வரை எடை கொண்டதாக இருக்கும். ஆண் பறவைக்கும், பெண் பறவைக்கும் சில வேறுபாடுகள் இருக்கிறது. மரத்திலும், வீடுகளின் மறைவான இடங்களிலும் வைக்கோல் போன்ற மெல்லிய பொருட்களை வைத்து கூடு கட்டி வாழும் தன்மை கொண்டது.

தானியங்கள், புழு, பூச்சிகளை உணவாக கொள்ளும் சிட்டுக்குருவி, 13 ஆண்டுகள் வரை வாழும் தன்மை பெற்றவை. சுற்றுச்சூழல் மாற்றங்களின் காரணமாக, இந்தப் பறவைகள் அழிந்து வருவதாக ஆராய்ச்சியாளர்கள் தெரிவிக்கின்றனர். இதன் பின்னணியில் மனிதன் இருக்கிறான் என்பதுதான் வேதனையின் உச்சமாகும்.

குறிப்பாக செல்போன் டவர்களில் இருந்து வெளிப்படும் மின்காந்த அலைகளின் தாக்கம் காரணமாக, இந்த குருவிகளின் இனப்பெருக்க மண்டலம் பாதிக்கப்பட்டு, இவற்றின் இனப்பெருக்கம் குறைந்து வருவதாக கண்டறியப்பட்டு உள்ளது.

மனிதனின் பழக்க வழக்கங்களில் ஏற்பட்டுள்ள மிகப்பெரிய மாறுதல்கள், நவீன தகவல் தொழில் நுட்பப் புரட்சி, இயற்கைக்கு மாறாக எடுக்கப்படும் சுற்றுச்சூழல் நடவடிக்கை போன்ற காரணங்களால், சிட்டுக்குருவி எனும் சிற்றினம் அழிவுப்பாதைக்கு தள்ளப்பட்டுள்ளதாகவும் ஆய்வாளர்கள் தெரிவிக்கின்றனர்.

சிட்டுக்குருவிகள் அழிவதற்கு பல காரணங்கள் சுற்றுசூழலில் இருக்கின்றன.

குறிப்பாக, நவீனமயமாகி வரும் வீடுகள், கட்டிடங்களில் சிட்டுக்குருவிகளால் கூடு கட்டி இருக்க இயலாமல்போகிறது. வீட்டு தோட்டங்கள் மற்றும் வயல்களில் பயிர்களுக்கு அதிவிஷம் கொண்ட பூச்சிகொல்லி மருந்துகளை தெளித்து குருவிகளுக்கு இரையாகும் பூச்சிகள் அழிக்கப்படுகிறது.

பல்பொருள் அங்காடிகள் பெருகி வருகையில் நெகிழிப் பைகளில் தானியங்கள் அடைத்து விற்கப்படுவதால், வீதிகளில் தானியங்கள் சிதற வாய்ப்பில்லாத சூழலும் நிலவுகிறது.

இதுபோன்ற காரணங்களினால் ஏற்படும் உணவு பற்றாக்குறையும் குருவிகளை வாட்டுகின்றன.

சிட்டுக்குருவிகளின் எண்ணிக்கை அண்மைக் காலங்களில் குறைந்து வருவதன் காரணமாகவும், நாள்தோறும் தமது வாழ்வுக்காக அவை எதிர்நோக்கும் பிரச்சினைகளை மக்களுக்கு எடுத்துக்கூறி, அதன் வாயிலாக விழிப்புணர்வை ஏற்படுத்தவும் கடந்த 2010-ம் ஆண்டு முதல், மார்ச் 20-ம் தேதியை ‘உலக சிட்டுக் குருவிகள் தினம்’ என்ற பெயரில் கடைப் பிடித்து வருகிறோம்.

சிட்டுக்குருவியின் ஓசை அனைத்து இல்லங்களிலும் ஒலிக்க வேண்டும் என்பதே அனைவரின் விருப்பமாக இருக்கிறது. இதற்கான நடவடிக்கையில் அனைவரும் களம் இறங்கினால், சிட்டுக்குருவிகள் மீண்டும் குடியிருப்பு பகுதியில் சிறகடிப்பது நிச்சயம்.

சிட்டுக்குருவிகள் தென்பட்டால், அவற்றுக்கு தூய்மையான நீர், தானியங்களை வைக்கலாம்.

வீட்டில் ஓர் இடத்தில் (காற்றாடி இல்லாத பகுதியில்) அட்டை பெட்டியை வைத்து, அதில் சிறிய துவாரம் இடுங்கள். அதன் உள்ளே சிறிதளவு வைக்கோல் அல்லது தேங்காய் நார்களை வைக்கலாம். அதை சிட்டுக்குருவி தன்னுடைய இல்லமாக மாற்றி குடியேற வாய்ப்பு கிடைக்கும்.

மேலும், வீட்டுக்கு அருகில் செம்பருத்தி, மல்லிகை, முல்லை போன்ற செடிகளை வைக்கலாம். அவை இருந்தாலே உங்கள் வீட்டில் விரைவில் சிட்டுக்குருவிகள் குடியேறிவிடும். இதுபோன்ற நடவடிக்கைகளை மேற்கொள்வதன் மூலம் சிட்டுக்குருவிகளின் இனிய சங்கீதத்தை மீண்டும் கேட்க வாய்ப்பு பிறக்கும் என்பதில் அய்யமில்லை.

பொதுவாக மனிதனின் வாழ்விடத்தை சார்ந்தே இருக்கும் பறவைகளை ரசாயன உரங்களை தவிர்ப்பது, நீர் மற்றும் காற்று மாசுப்பாட்டை தடுப்பது, மரங்களை பாதுகாப்பது போன்ற செயல்களால் சிட்டுக்குருவி இனத்தை மீண்டும் உயிர்ப்பிக்க முடியும். அவற்றை அழிவில் இருந்து மீட்பதன் அவசியத்தை உணர்த்தும் வகையில், இந்திய தபால் துறையும் சிட்டு குருவி சிறப்பு தபால் தலையை வெளியிட்டு இருக்கிறது. நாமும் நம்மால் இயன்ற முயற்சிகளை மேற்கொள்ள வேண்டும்…