இயற்கையின் கருணை… ‘எவா் கிரீன்’ ராட்சத கப்பல் மீட்கப்பட்டது எப்படி…?

Read Time:7 Minute, 46 Second

எகிப்து நாட்டில் உள்ள சூயஸ் கால்வாய் ஆசியாவின் மத்திய தரைக்கடல் பகுதியையும் ஐரோப்பாவின் செங்கடல் பகுதியையும் இணைக்கும் முக்கிய நீர்வழித்தடமாகும்.

193 கிலோமீட்டர் நீளமுள்ள இந்த கால்வாய் உலகின் முக்கிய நீர்வழிகளில் ஒன்றான சூயஸ் கால்வாய் 1869-ம் ஆண்டு திறக்கப்பட்டது.

ஆப்பிரிக்க கண்டத்தை சுற்றிச்செல்ல வேண்டியதை தவிர்த்து பல ஆயிரம் கிலோமீட்டர்கள் பயண தூரத்தை குறைக்கும் நோக்கில் இந்த கால்வாய் அமைக்கப்பட்டது.

சூயஸ் கால்வாய்க்கு மாற்று வழியாக ஆசியா – ஐரோப்பா இடையே பயணிக்க வேண்டுமானால் ஆப்ரிக்க கண்டத்தின் தெற்கு முனையான நன்னம்பிக்கை முனையை சுற்றித்தான் செல்ல வேண்டும். ஆனால் அதற்கு சுமார் 2 வார காலம் கூடுதல் நேரம் தேவைப்படும். அதற்கேற்ப எரிபொருள், உணவு கையிருப்பு ஆகியவையும் அதிகமாகும்.

சர்வதேச வர்த்தகத்தில் அதிலும் குறிப்பாக எண்ணெய் வர்த்தகத்தில் இந்த சூயஸ் கால்வாயின் பங்கு மிக முக்கியமானதாக இருக்கிறது. இங்கு வர்த்தகம் தடைப்பட்டால் எண்ணெய் வர்த்தகம் மற்றும் கச்சா விலையில் மிகப்பெரிய தாக்கம் ஏற்படும். நீண்ட காலம் மூடப்பட்டால், உலக பொருளாதாரத்திற்கு அதிக இடையூறு ஏற்படும்..

உலகளாவிய வர்த்தக கப்பல் போக்குவரத்தில் சுமார் 12 சதவீதம் சூயஸ் கால்வாய் வழியாகவே செல்கிறது.

இந்நிலையில் சீனாவில் இருந்து நெதர்லாந்து நோக்கி சென்று கொண்டிருந்த 400 மீட்டர் நீளமும் 59 மீட்டர் அகலமும் கொண்ட உலகின் மிகப்பெரிய சரக்கு கப்பல்களில் ஒன்றான எவர்கிவ்வன் என்ற சரக்கு கப்பல் கடந்த செவ்வாய்க்கிழமை சூயஸ் கால்வாயின் இரண்டு பக்க கரைகளில் மோதி சிக்கியது.

இதனால் அந்த வழித்தடத்தில், கப்பல் போக்குவரத்து முற்றிலும் பாதிக்கப்பட்டது. கப்பலின் முன்பகுதி கரையின் ஒரு முனையில் புகுந்து நிலையில் பின்பகுதி மற்றொரு கரையை நெருங்கியவாறு நின்றது. இதனால் 300-க்கும் அதிகமான கப்பல்கள் சூயஸ் கால்வாயை கடக்க முடியாமல் நடுக்கடலில் நிற்கும் சுழல் ஏற்பட்டது. இந்த சம்பவத்தால், சர்வதேச வர்த்தகம், பெரிதும் பாதிக்கப்பட்டது.

இதனால் ஒவ்வொரு நாளும் 9.6 பில்லியன் அமெரிக்க டாலர் (இந்திய மதிப்பில் சுமார் ரூ.70 ஆயிரம் கோடி) மதிப்புள்ள சரக்கு தேங்கும் சூழ்நிலை உருவாகியுள்ளதாக கப்பல் போக்குவரத்து தொடர்பான தரவுகள் சுட்டிக்காட்டின. அதாவது ஒவ்வொரு மணி நேரமும் சுமார் 40 கோடி அமெரிக்க டாலர் மதிப்புள்ள சரக்குப்போக்குவரத்து பாதிக்கப்படுகிறது என்பதாகும்.

இந்த நிலையில் இந்த ராட்சத சரக்கு கப்பலை கால்வாயின் கரையில் இருந்து நகர்த்தி மீண்டும் மிதக்க வைப்பதற்கான முயற்சிகள் தொடங்கியது. ஆனால் இந்த முயற்சிகளுக்கு எந்த பலனும் கிடைக்கவில்லை. இதனால் சூயஸ் கால்வாயின் தெற்கு முனையில் காத்திருக்கும் கப்பல்களின் எண்ணிக்கை பன்மடங்கு அதிகரிக்க தொடங்கியது.

இதனால் கப்பலை எப்படியாவது மிதக்கச் செய்ய வேண்டும் மிகுந்த நெருக்கடி ஏற்பட்டது. கப்பலை மீண்டும் நீரில் மிதக்க வைக்கும் முயற்சியில் 13 இழுவைப் படகுகளும், இரண்டு அகழ்வு எந்திரங்களும் ஈடுபடுத்தப்பட்டது. கப்பல் சிக்கிக்கொண்ட முன்பகுதியில் இருந்த சகதிகளை அள்ளும் பணி நடைபெற்றது. இழுவை படகுகள் கப்பலை மிதக்க வைக்கும் முயற்சியில் ஈடுபட்டன.

வெள்ளிக்கிழமை அந்த கப்பலை மீண்டும் மிதக்க வைக்கும் முயற்சி தோல்வி அடைந்தது. கப்பலின் இடது பக்கத்தில் இருக்கும் மணல் மற்றும் சகதியை நீக்கும் முயற்சிகளில் கவனம் செலுத்தப்பட்டது. ஒரு மணி நேரத்துக்கு 2,000 கியூபிக் மீட்டர் சக்தியை உறிஞ்சி எடுக்கும் அகழ்வு எந்திரம் வியாழன் முதல் பணியில் ஈடுபடுத்தப்பட்டது

இந்த நிலையில் கப்பலின் உரிமையாளரான ஜப்பானைச் சேர்ந்த ஷோய் கிசென் நிறுவனத்தின் தலைவர் யுகிடோ கப்பலை மீண்டும் மிதக்கவைப்பதற்கு சாத்தியமான அனைத்து வழிமுறைகளையும் தொடர்வதாகவும், இவை எதுவுமே பலன் தராத பட்சத்தில் கப்பலில் உள்ள கன்டெய்னர்கள் அனைத்தையும் அகற்றி விட்டு கப்பலை விடுவிப்பதற்கான நடவடிக்கைகள் மேற்கொள்ளப்படும் என உறுதியளித்தார்.

இதனிடையே கப்பலை நகர்த்தும் பணியில் எந்தவித முன்னேற்றமும் காணப்படாத நிலையில் கடலில் காத்திருக்கும் கப்பல்களில் சில தங்கள் பாதையை மாற்ற தொடங்கியது.

இருப்பினும் சகதியை அகற்றும் ராட்சத எந்திரங்கள் மற்றும் 13-க்கும் மேற்பட்ட இழுவை படகுகளை கொண்டு அந்த ராட்சத சரக்கு கப்பலை கரையில் இருந்து நகர்த்தி மீண்டும் மிதக்க வைக்கும் பணிகள் கடந்த 6 நாட்களாக இரவுப்பகலாக நடந்து வந்தன. சரியாக ஒரு வாரம் நடந்த தீவிர மீட்பு பணியின் பலனாக திங்கள் கிழமை மதியம் எவர்கிரீன் சரக்கு கப்பல் கரையிலிருந்து நகர்த்தப்பட்டு மீண்டும் மிதக்க தொடங்கியது.

அதனை தொடர்ந்து மாலையில் அந்த கப்பல் அங்கிருந்து அகற்றப்பட்ட பின்னர் சூயஸ் கால்வாயில் முற்றிலும் இயல்பு நிலை திரும்பியது. மீட்பு பணி எவ்வாறு நடைபெற்றது என்றால், சகதியை அகற்றும் ராட்சத எந்திரங்கள் சகதியை அகற்றிய போது கப்பலில் முன்பகுதி சகதியில் இருந்து மீள தொடங்கியது. அப்போது இழுவை படகுகள் கப்பலின் பின்பகுதியை கரைப்பகுதியில் இருந்து மத்திய நீர் பகுதியை நோக்கி இழுத்தன. முன்பகுதியை ஒரு கரையில் இருந்து மீட்ட போது, பின்பகுதி நீர் பகுதியை நோக்கியதால் கப்பல் மீண்டும் மிதக்கச் செய்யப்பட்டது.

இந்த பணி முடிய இயற்கையும் கருணை காட்டியுள்ளது என்றுதான் சொல்ல வேண்டும். நேற்று முன்தினம் பெரிய பவுர்ணமி நாளாகும். இந்நாளில் வழக்கமாக கடலில் அலைகள் வேகமாக அடிக்கும்… அவ்வாறு சூயல் கால்வாயின் இரு பகுதியிலும் கடல் அலைகளால் நீர் மட்டம் உயர்ந்தது. அலைகளின் வேகமும் அதிகரிக்க கப்பல் மிதக்க தொடங்கியிருக்கிறது. இதனையடுத்து இனிதாக சூயஸ் கால்வாயை கப்பல் போக்குவரத்து மீண்டும் தொடங்கியது….