திருப்பதிக்கு நிகராக நரசிம்மர் கோவில்… 14 ஏக்கர் பரப்பளவில் கட்டப்படும் கற்கோவில்

Read Time:5 Minute, 30 Second

தெலுங்கானா ஐதராபாத்திலிருந்து சுமார் 75 கி.மீ. தொலைவில் உள்ளது யாதகிரி குட்டா.

இங்கு இருக்கும் மலையில் அமைந்துள்ள லஷ்மி நரசிம்மர் ஆலயம் மிகப் பழமையானது.

இதிகாசங்களுடன் தொடர்புடைய இந்த கோவிலை திருப்பதி ஏழுமலையான் கோவிலுக்கு நிகராக தெலுக்கானா அரசு மிக பிரம்மாண்டமாக ரூ.1,800 கோடி செலவில் கட்டி வருகிறது.

குகைக்கோயிலான இங்கிருக்கும் கோவிலில் மூலவரான லட்சுமி நரசிம்மர் மிகவும் சக்தி வாய்ந்தவர். பஞ்ச நரசிம்ம ஷேத்திரத்தில் ஒன்றாக இருக்கும் இத்தலம் ரிஷி ஆராதனை ஷேத்திரம் என்றும் அழைக்கப்படுகிறது. கடந்த 2016-ல் தெலுங்கானா ராஷ்டிரிய சமிதி கட்சியின் தலைவரும் முதல்வருமான சந்திரசேகரராவ் கோவில் கட்டுமான பணிகள் தொடங்கி வைத்தார்.

யாதாத்ரி கோயில் வளர்ச்சி குழு நியமிக்கப்பட்டு குழுவினரின் மேற்பார்வையில் மிக பிரம்மாண்டமான முறையில் யாதாத்ரி லட்சுமி நரசிம்மர் கோயில் கட்டப்பட்டு வருகிறது.

ஆகம சாஸ்திரங்களின்படி கட்டப்பட்டு வரும் இக்கோவில் வரலாற்று சிறப்புமிக்க வகையில் சிமெண்ட், மணல், இரும்பு போன்றவைகளால் கட்டப்படாமல், வெறும் கற்களால் மட்டுமே கட்டப்பட்டு வருகிறது. மன்னர்கள் கால கட்டமைப்பில் கட்டப்படுகிறது.

கோவிலில் உள்ள மூலவர் 12 அடி உயரமும், 30 அடி நீளமும் கொண்ட குகையில் வீற்றிருக்கிறார்.

இது தற்போது புதிய வடிவமைப்பில் கோயிலின் பின்புறம் அமைந்துள்ளது.

இந்த குகைக்கு செல்ல வேண்டுமாயின் பக்தர்கள் படிக்கட்டுகள் மூலம் இறங்கி சுவாமியை தரிசிக்க வழி ஏற்படுத்தப்பட்டுள்ளது. இக்கோவிலில் நாக வடிவில் உள்ள ஜுவாலா நரசிம்மர், யோக முத்திரையில் யோக நரசிம்மர், வெள்ளியில் லட்சுமி நரசிம்மர் ஆகியோர் பக்தர்களுக்கு அருள் பாலிக்கின்றனர். கோவிலின் வலது புறம் அனுமன் கோவிலும் உள்ளது.

பிரசித்தி பெற்ற இந்த வைணவ திருத்தலத்திற்கு தினமும் ஐதராபாத் உள்பட மாநிலத்தின் பல பகுதிகளில் இருந்து ஏராளமான பக்தர்கள் வந்து செல்கின்றனர்.

காக்கதீயர்களின் காலத்தில் வடிவமைக்கப்பட்ட கட்டிட கலையை மாதிரியாக கொண்டு கருப்பு கிரானைட் கற்கள் உபயோகப்படுத்தப்பட்டுள்ளன. சுவாமியின் சிலைகள் அனைத்தும் கிருஷ்ண சிலா என்று அழைக்கப்படும் கற்களால் செய்யப்பட்டு வருகிறது.

ஸ்திரீ சிலா எனும் கற்கள் மூலம் பெண் கடவுள்களின் சிலைகள் அமைக்கப்பட்டு வருகிறது.

நபுசகா சிலா என்றழைக்கப்படும் கற்கள் மூலம் கோயிலில் தரை மற்றும் சுவர்கள் கட்டப்பட்டு வருகிறது. மேலும் கருப்பு நிற கிரானைட் கற்களும் பயன்படுத்தப்படுகிறது.

கருப்பு கிரானைட் கற்கள் மூலம் சில சிலைகளும் செதுக்கப்பட்டு உள்ளன.

கோவில் கட்டிட பணிகள் தொடர்ந்து நடைபெற்று வருகிறது.

கோவிலில் மூலவரை தரிசிக்காவிடிலும் பாலாலயம் மூலம் சுவாமியை தரிசித்து விட்டு செல்கின்றனர். இக்கோவிலுக்கு 39 கிலோ தங்கம், 1,753 டன்வெள்ளி பயன்படுத்தப்பட்டுள்ளது.

விமான கோபுரம், பலிபீடம், கொடி கம்பம் போன்றவற்றுக்கு தங்க தகடுகள் பொருத்தப்பட்டு உள்ளன. மேலும், கோயில் கதவுகள், வாசற்படிகள், சுவர்களுக்கு வெள்ளி தகடுகள் பொருத்தப்பட்டு உள்ளன. இரு கற்களுக்கிடையே பழங்காலத்தில் உபயோகப்படுத்தப்பட்ட சுண்ணாம்பு கலவை கோவில் கட்டுமானத்திற்கு பயன்படுத்தப்படுகிறது.

மேலும் 300 கோடி ரூபாய் செலவில் கோவிலின் சுற்றுப்புறத்தில் உள்ள சுமார் 1,900 ஏக்கர் தனியார் இடங்கள் வாங்கப்பட்டு உள்ளன. கோவில் 14 ஏக்கர் பரப்பளவில் உருவாகி வருகிறது.

மொத்தம் 7 கோபுரங்கள் உள்ளடக்கிய கோவிலில் விரத பீடம், சுவாமிக்கான பூந்தோட்டம், கல்யாண மண்டபம், சத்திரங்கள் ஆகியவை அமைக்கப்பட்டுள்ளன. மேலும் 12 ஆழ்வார்களை குறிக்கும் வகையில் 12 மிகப்பெரிய தூண்களும் அமைக்கப்பட்டு உள்ளன. கோவிலின் முகப்பில் ஒரு வளைவு அமைக்கப்பட்டு உள்ளது. இந்த வளைவு பஞ்ச பூதங்களை குறிக்கும் வகையில் அமைக்கப்பட்டு இருக்கிறது.

மேலும் இங்குள்ள விஷ்ணு குண்டம் எனும் குளமும் சீரமைக்கப்பட்டு வருகிறது. மிக அழகாகவும், கம்பீரமாகவும் கட்டப்பட்டு வரும் இக்கோவில் தெலங்கானா மாநிலத்தின் ஒரு அடையாளமாக மாறப்போவது உறுதி என்பது அனைவருடைய பார்வையாக உள்ளது.