இந்தியாவில் கொரோனா 2-வது அலைக்கு காரணம் என்ன…?

Read Time:3 Minute, 29 Second

இந்தியாவில் கொரோனா முதல் அலையின் போது ஒரு நாள் பாதிப்பு அதிகபட்சம் 1 லட்சத்துக்குள் இருந்தது. பின்பு அது 10 ஆயிரத்துக்கு கீழே கட்டுப்படுத்தப்பட்டது.

ஆனால் இப்போது இரண்டாவது அலையில் தினசரி பாதிப்பு 1 லட்சத்தை கடந்து செல்வது அதிர்வலைகளை ஏற்படுத்தி இருக்கிறது. இந்தியாவில் கொரோனா பரவலின் 2-வது அலை எழுச்சி பெற காரணம் என்ன என்பது குறித்து மருத்துவ நிபுணர்கள் விளக்கம் அளித்து உள்ளனர்.

இந்திய பொது சுகாதாரத்துறையை சேர்ந்த மருத்துவர் கிரிதரா ஆர்.பாபு பேசுகையில், கொரோனா தொற்று பரவல் அதிகரிக்க பல சாத்தியங்கள் உள்ளன. புதிய வகை கொரோனா பரவலை அரசு ஒப்புக்கொள்ளாவிட்டாலும் கூட நிச்சயமாக தொற்று பரவல் அதிகரிப்பில் அவற்றுக்கு பங்கு இருக்கிறது. அவற்றில் சில நோய் எதிர்ப்பு தன்மைக்கு தப்பிப்பவையாகவும், முந்தைய வைரஸ்களை விட வேகமாக பரவுபவையாகவும் உள்ளன.

பொதுவாக புதிய வகை கொரோனா வைரஸை நோய் எதிர்ப்புச்சக்தி கண்டறிவதில்லை. இதே போன்று தென் ஆப்பிரிக்க வகையில், துணை குழுக்களும் உள்ளன. அதுவும் ஆன்டிபாடிகளால் கண்டறியப்படுவதில்லை.

இந்தியாவில் கொரோனா தடுப்பூசி போடுவது எதிர்பார்த்த அளவுக்கு வேகம் இல்லை. ஆபத்து உள்ளவர்கள் தடுப்பூசி போட்டுக்கொள்வது திருப்திகரமாக இல்லை.

பாதிப்பு ஏற்பட்டவருக்கு நோய் எதிர்ப்பு சக்தி உருவாகி குறைந்த பின்னர் மீண்டும் பாதிப்பு ஏற்படுவதற்கு வாய்ப்பு இருக்கிறது. இது விரிவாக ஆராயப்படவில்லை. இதன்விளைவாக நிறைய எண்ணிக்கையிலானவர்கள் பாதிக்கப்படக்கூடியவர்களாக இருப்பார்கள்.

சுற்றுச்சூழல் காரணங்களும், சமூக நடத்தையும் கொரோனா பரவலில் முக்கிய பங்கு வகிக்கின்றன. பொதுக்கூட்டங்கள், திருமணம் போன்ற விழாக்களில் பங்கேற்கிறபோது ஒருவரிடம் இருந்து மற்றொருவருக்கு பரவ வாய்ப்பாகிறது எனக் கூறியிருக்கிறார்.

தொற்றுநோயியல் நிபுணர் மருத்துவர் என்.கே.அரோரா பேசுகையில், 4 அல்லது 5 காரணிகள் ஒரே நேரத்தில் சேர்ந்து செயல்படுவதால் தொற்று பரவல் அதிகரிக்கிறது.

வைரஸ் பரவல் அலை போல வருவது இயல்பான ஒன்று தான். கொரோனா பரவல் பற்றிய பயம், முதல் 6 மாதங்களில் இருந்த அளவுக்கு இப்போது இல்லை. பாதிப்பு குறைந்து விட்டது என்று பொருளாதாரம் எல்லாவற்றையும் அரசு திறந்து விட்டது. ஆனால் வெளியே வரும் மக்கள் கடந்த கால கொரோனா பாதிப்பை கவனத்தில் கொள்ளாமல் முக கவசம் அணிவதில்லை. பொது இடங்களில் கூட்டம் கூடுவது அதிகரித்து இருக்கிறது. இது லேசான நோய் என்ற எண்ணமும் வந்து விட்டது. புதிய வகை கொரோனாவும் பரவல் அதிகரிக்க ஒரு காரணம் தான் என்றார்.