இந்தியாவுக்கு தடுப்பூசி மூலப்பொருட்களை வழங்க அமெரிக்க நிறுவனங்கள் மறுப்பு

Read Time:3 Minute, 48 Second

இந்தியாவில் கடந்த ஒன்றரை மாதமாக கொரோனா பாதிப்பு தினசரி அதிகரித்து வருகிறது. அதிலும் கடந்த 6 நாட்களாக தினசரி பாதிப்பு 2 லட்சத்தை தாண்டி 3 லட்சத்தை நோக்கி சென்று கொண்டிருக்கிறது.

சில மாநிலங்களில் கொரோனா தடுப்பூசிக்கு தட்டுப்பாடு நிலவுவதாக புகார் எழுந்துள்ளது.

இந்நிலையில் தடுப்பூசி உற்பத்திக்கு தேவையான மூலப்பொருட்களை அமெரிக்க நிறுவனங்கள் இந்தியாவுக்கு ஏற்றுமதி செய்ய மறுத்து வருகின்றன என தெரியவந்துள்ளது. இதுதான் தடுப்பூசி தட்டுப்பாடுக்கு முக்கிய காரணமாக கருதப்படுகிறது.

அமெரிக்க மக்கள் அனைவருக்கும் ஜூலை 4-ம் தேதிக்குள் தடுப்பூசி போட அமெரிக்கா இலக்கு நிர்ணயித்துள்ளது.

எனவே, பைசர், மாடர்னா போன்ற அமெரிக்க நிறுவனங்கள், தடுப்பூசி உற்பத்தியை தீவிரப்படுத்தி உள்ளன. இந்தியா உள்பட உலகம் முழுவதும் பெரிதும் தேவைப்படும் மூலப்பொருட்களை வினியோகிக்கும் நிறுவனங்கள், அமெரிக்க தேவைக்கு மட்டுமே வினியோகித்து வருகின்றன.

கடந்த 1950-ம் ஆண்டு அமெரிக்காவில் பாதுகாப்பு உற்பத்தி சட்டம் கொண்டு வரப்பட்டது. அமெரிக்காவின் தேச பாதுகாப்புக்கு தேவையான மூலப்பொருட்களை உள்நாட்டு பயன்பாட்டுக்கு முன்னுரிமை அளித்து வினியோகிக்க வேண்டும் என்று இந்த சட்டம் கூறுகிறது.

அதன்படி, தடுப்பூசி, முழு கவச உடைகள் உற்பத்தியில் உள்நாட்டுக்கு முன்னுரிமை அளிக்கப்படுகிறது.

இதனால், மூலப்பொருட்களை பிற நாடுகளுக்கு ஏற்றுமதி செய்ய அமெரிக்க நிறுவனங்கள் மறுக்கின்றன. கோவிஷீல்டு தடுப்பூசி உற்பத்தி செய்யும் சீரம் இன்ஸ்டிடியூட் நிறுவனத்தின் தலைமை செயல் அதிகாரி அடார் பூனவல்லா முதல் முறையாக இப்பிரச்சினையை அமெரிக்க அரசின் கவனத்துக்கு எடுத்துச் சென்றுள்ளார். அமெரிக்காவுக்கான இந்திய தூதர் தரன்ஜித்சிங் சந்துவும் அமெரிக்க அதிகாரிகளிடம் இதுபற்றி பேசியுள்ளார். இருப்பினும், எந்த மாற்றமும் ஏற்படவில்லை.

இந்தநிலையில், அமெரிக்க ஜனாதிபதி ஜோ பைடன் தலைமையிலான நிர்வாகம், இந்த பிரச்சினையை உரிய முறையில் பரிசீலிப்பதாக இந்தியாவிடம் உறுதி அளித்துள்ளது.

இந்தியாவின் மருந்து தேவையை அமெரிக்கா உணர்ந்துள்ளது. மூலப்பொருட்கள் ஏற்றுமதிக்கு தடை எதுவும் விதிக்கப்படவில்லை. இதற்கு உள்நாட்டு சட்டம்தான் காரணம். உள்நாட்டு தேவைக்கு இச்சட்டம் முன்னுரிமை அளிக்கிறது. இருப்பினும், இப்பிரச்சினையை பரிசீலிக்கிறோம் என ஜோ பைடன் நிர்வாகம் தெரிவித்துள்ளது.

ஆனால் தடுப்பூசி மூலப்பொருட்கள் ஏற்றுமதிக்கான தடையை நீக்க வேண்டும் என்ற சீரம் இன்ஸ்டிடியூட் நிறுவனத்தின் கோரிக்கை குறித்து அமெரிக்க வெள்ளை மாளிகை பத்திரிகை தொடர்பு செயலாளர் ஜென் பைசாகி தங்களுக்கு எதுவும் தெரியாது எனக் கூறிவிட்டார்.