மதுரையில் கொரோனா நோய் எதிர்ப்பு சக்தி மருந்து பெட்டி ரூ. 50 க்கு விற்பனை..! மாநகராட்சி அசத்தல்..!

Read Time:4 Minute, 9 Second

தமிழகத்தில் சென்னைக்கு அடுத்தப்படியாக கொரோனா வேகமாக பரவும் ஊர்களில் மதுரையும் ஒன்று. இதனால் மதுரையில் கொரோனா தடுப்பு பணியாக நோய் எதிர்ப்பு சக்தி மருந்துகள் அடங்கிய மருந்து பெட்டி வழங்கும் நிகழ்ச்சி மதுரை மாநகராட்சி அண்ணா மாளிகையில் நேற்று மீண்டும் தொடங்கியுள்ளது. இந்நிகழ்ச்சிக்கு மாநகராட்சி கமிஷனர் விசாகன் தலைமை தாங்கினார். கலெக்டர் அன்பழகன் மருந்து பெட்டகத்தை வழங்கி பேசினார்.

இந்த ஆண்டு கொரோனாவின் 2-வது அலை தாக்கத்தின் வேகம் மிக அதிகமாக உள்ளது. கடந்த ஆண்டு மதுரை மாவட்டத்தில் அனைத்து அலுவலர்களின் கூட்டு முயற்சியால் கொரோனா கட்டுப்படுத்தப்பட்டது. அதேபோல் இந்த ஆண்டு 2-வது அலையின் தாக்கத்தை கட்டுப்படுத்துவதற்கு பல்வேறு தடுப்பு பணிகள் மேற்கொள்ளப்பட்டு வருகிறது.

  • தடுப்பூசிகள் போடுவது
  • அதிகப்படியான பரிசோதனை மேற்கொள்ளுதல்
  • நோய் வாய்பட்டவர்களை உடனுக்குடன் மருத்துவமனையில் சேர்த்தல்
  • நோய் தொற்றினை மேலும் பரவாமல் தடுத்தல்
  • பல இடங்களில் காய்ச்சல் கண்டறியும் முகாம்கள் நடத்தப்படுகின்றன
  • மேலும் நோய் எதிர்ப்பு சக்தியை அதிகரிக்கும் வகையில் நோய் எதிர்ப்பு சக்தி மருந்துகள் அடங்கிய மருந்து பெட்டகம் வழங்கப்படுகிறது.

மருந்து பெட்டியில்

  • ஆடதோட மணப்பாகு,
  • தாளிசாதி மாத்திரைகள்,
  • கபசுரக் குடிநீர் சூரணம் (பொடி) ஆகிய மருந்துகள் உள்ளன.

அதன் விலை வெறும் ரூ.50 மட்டும் தான். இந்த மருந்து பெட்டி மாநகரில் உள்ள அனைத்து வணிக வளாகங்கள், பொதுமக்கள் அதிக அளவில் கூடும் இடங்களில் விற்பனைக்கு வைக்கப்பட உள்ளது. இது ஒரு உயிர்க்காக்கும் மருந்து பெட்டகம் ஆகும்.

தன்னார்வலர்கள், குடியிருப்போர் நலச்சங்கங்கள், மொத்த விற்பனையாளர்கள் ஆகியோர் அவரவர் பகுதிகளில் வசிக்கும் பொதுமக்களுக்கு வழங்குவதற்கு வாங்கி சென்று உள்ளனர். குறிப்பாக செஞ்சிலுவை சங்கத்தினர், தன்னார்வலர்கள் இப்பணியினை மிக சிறப்பாக மேற்கொண்டு வருகிறார்கள்.

பொதுமக்கள் அனைவரும் கட்டாயம் முகக்கவசம் அணிதல், தடுப்பூசி போடுதல், சமூக இடைவெளியினை பின்பற்றுதல் ஆகியவற்றை கடைப்பிடிக்க வேண்டும்.

முன்பு பொதுமக்கள் தடுப்பூசி போடுவதற்கு தயக்கம் தெரிவித்த காரணத்தினால் தடுப்பூசி இருப்பு இருந்தது. கொரோனா 2-ம் அலையின் தாக்கம் அதிகமாக இருப்பதால் ஒரே நேரத்தில் பொதுமக்கள் அதிக அளவில் தடுப்பூசி செலுத்த வந்த காரணத்தினால் இருப்பு குறைந்து தட்டுப்பாடு ஏற்பட்டது. தற்போது கடந்த 3 நாட்களாக தமிழக அரசு போதுமான அளவு தடுப்பூசி வழங்கி உள்ளது, தட்டுப்பாடு ஏதும் இல்லை.

முன்பு கொரோனா முகாமில் பரிசோதனை மட்டும் செய்யப்பட்டது. ஆனால் தற்போது பரிசோதனை செய்வதுடன் தடுப்பூசியும் அங்கேயே செலுத்தப்படுகிறது. மதுரை மாவட்டத்தில் நாள் ஒன்றுக்கு சுமார் 250 முகாம்கள் நடைபெற்று வருகிறது என்றார்.

இந்த நிகழ்ச்சியில் நகர்நல அலுவலர் குமரகுருபரன், உதவி கமிஷனர்கள் சேகர், பிரேம்குமார், சண்முகம், சுரேஷ்குமார், உதவி செயற்பொறியாளர் மனோகரன். மக்கள் தொடர்பு அலுவலர்கள் சித்திரவேல், நவீன்பாண்டியன், சுகாதார அலுவலர் சிவசுப்பிரமணியன் உள்பட மாநகராட்சி அலுவலர்கள் கலந்து கொண்டனர்.