கொரோனா தடுப்பூசிக்கு பதில் வாய்வழி மருந்து…!

Read Time:2 Minute, 26 Second

கொரோனா வைரஸ் தொற்று நோயை தடுக்க ஊசிக்குப் பதிலாக, வாய்வழியாக உட்கொள்ளும் மருந்துகள் விரைவில் வர இருப்பதாக தகவல்கள் வெளியாகி உள்ளன.

இந்தியாவில் கொரோனா பரவல் உச்சத்தில் சென்று கொண்டிருக்கிறது. இதனை தடுக்க பல்வேறு நடவடிக்கைகளை மத்திய, மாநில அரசுகள் மேற்கொண்டு வருகின்றன. இதற்கிடையே ஆக்சிஜனுக்கு தட்டுப்பாடு ஏற்பட்டு மக்கள் பீதி அடைந்த நிலையில் தற்போது அதன் உற்பத்தி மற்றும் வினியோக பணிகள் முடுக்கிவிடப்பட்டுள்ளன.

இதைப்போல நாடு முழுவதும் தடுப்பூசி போடும் பணிகளும் தீவிரப்படுத்தப்பட்டு இருக்கிறது.
கொரோனா தடுப்பூசி உயிர்ப்பலியை குறைக்கிறது என்பதால் உலகம் முழுவதும் மக்கள் தடுப்பூசி போடுவதற்கு தற்போது ஆர்வம் காட்டி வருகிறார்கள்.

வாய்வழி மருந்து கிடைக்கப் போகிறது

இந்நிலையில் ஒரு மாற்றாக வாய்வழி மருந்து கிடைக்கப் போகிறது என்ற நம்பிக்கையூட்டும் தகவல்கள் வந்துள்ளன.

பிரபல மருந்து தயாரிப்பு நிறுவனமான பைசர் நிறுவனம் தான் அதற்கான முயற்சியில் தீவிரமாக இறங்கி இருக்கிறது. இந்த தகவலை அந்த நிறுவனத்தின் இயக்குனர் ஆல்பர்ட் போர்லா கூறியுள்ளார்.

மருந்து கட்டுப்பாட்டாளரின் அனுமதி உள்ளிட்ட எல்லா விஷயங்களும் சரியாக நடந்தால் இந்த ஆண்டின் இறுதிக்குள் இந்த மருந்து பயன்பாட்டுக்கு வரும் என்று நம்புவதாகவும் அவர் குறிப்பிட்டுள்ளார்.

வாய் வழியாக உட்கொள்ளும் இந்த மருந்து பயன்பாட்டுக்கு வந்தால் இந்த மருந்தை பொதுமக்கள் தங்களது வீடுகளுக்கு எடுத்துச் சென்று பயன்படுத்தி கொள்ளலாம் என்றும் கூறப்படுகிறது.

தற்போது கொரோனா தடுப்பூசி பயன்பாட்டில் உள்ள நிலையில், நோய் பாதித்தவர்களுக்கு சிகிச்சை அளிக்க ‘ரெம்டெசிவிர்’ அங்கீகரிக்கப்பட்ட மருந்தாக உள்ளது என்பது குறிப்பிடத்தக்கது.