கொரோனா நோயாளிகளுக்கு பரவும் கருப்பு பூஞ்சை நோய்…!

Read Time:5 Minute, 10 Second

கொரோனா நோயாளிகளுக்கு உயிருக்கு ஆபத்தை ஏற்படுத்துகிற கருப்பு பூஞ்சை நோய் தாக்குவது தெரியவந்து உள்ளது.

நாடு முழுவதும் கொரோனா வைரஸ் பெருந்தொற்றின் 2-வது அலை மக்களைப் வெகுவாக பாதித்து வருகிறது.

இந்த தருணத்தில் கொரோனா தொற்றில் இருந்து குணமான, குணமாகிற நோயாளிகளுக்கு, ‘மியூகோர்மைகோசிஸ்’ என்று அழைக்கப்படுகிற கருப்பு பூஞ்சைநோயும் தாக்குவதை மருத்துவர்கள் கண்டறிந்து உள்ளனர்.

இது ஒரு அரிதான மற்றொரு தொற்று நோய் என ஆராய்ச்சியாளர்கள் தெரிவிக்கிறார்கள்.

பொதுவாக மண், தாவரங்கள், அழுகும் பழங்கள் மற்றும் காய்கறிகளில் காணப்படுகிற ஒருவகை பூஞ்சையால் உருவாவதாக சொல்லப்படுகிறது. ஆனால் இந்த நோய் சைனஸ்கள், மூளை மற்றும் நுரையீரலை தாக்குகின்றன. இதுவும் உயிருக்கு ஆபத்தான நோய் தான் என மருத்துவர்கள் தெரிவிகிக்கின்றனர்..

ஸ்டீராய்டுகள் காரணம்…

கொரோனா நோயாளிகளைப் பொறுத்தமட்டில், அவர்களுக்கு உயிரைக் காக்க தருகிற ஸ்டீராய்டு மருந்துகளால் இந்த நோய் தூண்டப்படலாம் என மருத்துவர்கள் தரப்பில் கூறப்படுகிறது.

ஸ்டீராய்டுகளைப் பொறுத்தமட்டில், அவை கொரோனா நோயாளிகளின் நுரையீரல் வீக்கத்தை குறைத்து, கொரோனாவை எதிர்த்துப்போராட உடலின் நோய் எதிர்ப்பு அமைப்பு அதிகளவில் செயல்படுகிறது. மேலும் நுரையீரலுக்கு ஏற்படுகிற சில சேதங்களை தடுக்கின்றன. இருப்பினும் அவை நோய் எதிர்ப்புச்சக்தியை குறைத்து, நீரிழிவு நோயாளிகள் மற்றும் நீரிழிவு இல்லாத பிற கொரோனா நோயாளிகளின் ரத்த சர்க்கரையின் அளவை அதிகரித்து விடுகின்றன.

இவ்வாறு நோய் எதிர்ப்புச்சக்தி குறைவதுதான் கொரோனா நோயாளிகளின் மியூகோர்மைகோசிஸ் பிரச்சினைக்கு காரணமாக இருக்கலாம் என கூறப்படுகிறது.

மத்திய அரசு நடவடிக்கை

இதற்கிடையே இந்த நோய் தாக்குதல் பற்றிய தகவல்களை அறிந்ததும் இதற்கான மருந்து தயாரிப்பை அதிகரிக்க மத்திய அரசு அதிரடி நடவடிக்கையில் இறங்கி உள்ளது.

இது குறித்து மத்திய உரம் மற்றும் ரசாயனங்கள் அமைச்சகம் வெளியிட்ட அறிக்கையில், கொரோனாவுக்கு பிந்தைய சிக்கலாக மியூகோர்மைகோசிஸ் என்கிற கருப்பு பூஞ்சைநோய் தாக்குகிறது. இதற்கு ஆம்போடெரிசின்-பி என்ற மருந்து பரிந்துரை செய்யப்படுகிறது. இந்த மருந்துக்கான தேவை அதிகரித்து வருவது தெரியவந்து உள்ளது.

இந்த மருந்து உற்பத்தியை அதிகரிக்க மத்திய அரசு உற்பத்தியாளர்களுடன் பேசி வருகிறது.

இந்த மருந்தின் கூடுதல் இறக்குமதிகள் மற்றும் உள்நாட்டில் இதன் உற்பத்தி அதிகரிப்பு மூலம் வினியோக நிலை மேம்படும் என தெரிவிக்கப்ப்ட்டுள்ளது.

மேலும் உற்பத்தியாளர்கள் மற்றும் இறக்குமதியாளர்களிடம் இந்த மருந்து கையிருப்பு நிலையையும், தேவையையும் மத்திய அரசு ஆராய்ந்து, அதன் தொடர்ச்சியாக வரும் 31-ம் தேதி வரையில் இந்த மருந்து மாநிலங்கள், யூனியன் பிரதேசங்களில் கிடைக்க ஒதுக்கி உள்ளது எனவும் தெரிவிக்கப்பட்டுள்ளது.

இந்த மருந்தை அரசு மற்றும் தனியார் மருத்துவமனைகள் மற்றும் சுகாதார பராமரிப்பு நிறுவனங்கள் இடையே சம அளவில் வினியோகிப்பதற்கான ஒரு வழிமுறையை வைத்திருக்குமாறு மாநிலங்கள் கேட்டுக்கொள்ளப்பட்டுள்ளன. இந்த ஒதுக்கீட்டில் இருந்து அரசு மற்றும் தனியார் ஆஸ்பத்திரிகள் மருந்து பெறுவதற்கு தொடர்பு புள்ளி ஒன்றை ஏற்படுத்த வேண்டும் என்றும் மாநிலங்களை மத்திய அரசு கேட்டுக் கொண்டுள்ளது என தெரிவிக்கப்பட்டுள்ளது.

மேலும் இந்த மருந்தை நியாயமான விதத்தில் பயன்படுத்துவதற்கு மாநிலங்கள் அறிவுறுத்தப்பட்டுள்ளன. இந்த மருந்து வினியோகத்தை தேசிய மருந்துகள் விலை நிர்ணய ஆணையம் கண்காணிக்கும் என அறிக்கையில் கூறப்பட்டுள்ளது. கொரோனா வைரஸ் தொற்று நோய்க்கு மத்தியில் இப்போது கருப்புபூஞ்சை நோய் பரவல் மக்கள் மத்தியில் பெரும் அச்சத்தை ஏற்படுத்தி உள்ளது.