கொரோனாவுக்கு சவால் விடும் கிராமம்..! இந்தியாவுக்கே உதாரணமாக இருக்கிறது..

Read Time:2 Minute, 53 Second

இந்தியாவை நடுங்க வைத்து கொண்டிருக்கும் கொரோனா இரண்டாவது அலையில் வைரஸ் நம்மை தொற்றி கொள்ளாமல் எப்படி காப்பாற்றிக்கொள்வது என்று மக்கள் ஒவ்வொருவரும் தவிக்கின்றனர்.

பயம் இருந்தாலும் பொறுப்பின்றி ஊரடங்கை மதிக்காத மக்களும் உலாவிக்கொண்டு தான் இருக்கிறார்கள். இந்நிலையில் சுய கட்டுப்பாடு மூலம் கொரோனாவை வீழ்த்தலாம் என்பதை இந்தியாவுக்கு ஆந்திராவை சேர்ந்த கிராமம் எடுத்துக் காட்டுகிறது.

எத்தனை முறை கொரோனா அலை வந்ந்தாலும்… எவ்வளவு வீரியமாக வந்தாலும் காக்க முடியும் என்பதை உலகிற்கே எடுத்துக்காட்டி இருக்கிறார்கள் இந்த கிராமவாசிகள்.

ஆந்திர மாநிலம் கிருஷ்ணா மாவட்டத்தில் உள்ளது துக்கிரிலப்பாடு. இந்த கிராமத்தில் கொரோனா கட்டுப்பாடுகள் விஸ்தரிக்கப்பட்டு இருக்கிறது.

இந்த கிராமத்தில் ஒருவர் விட்டு வெளியே செல்வதற்கும், வெளியூர் மக்கள் கிராமத்திற்குள் நுழைவதற்கும் கட்டுப்பாடுகள் விதிக்கப்பட்டு உள்ளது. இங்குள்ள மக்கள் முககவசம் அணியாமலோ, கிருமிநாசினியை எடுத்து கொள்ளாமலோ வீட்டில் இருந்து வெளியே செல்வது கிடையாது.

கிராமத்தில் சுகாதார பணியாளர்கள் கிருமிநாசினி தெளித்தல் பணிகளை வாரம் இருமுறை மேற்கொள்கின்றனர்.

கிராமத்தில் 8 கடைகள் உள்ளன. இருப்பினும் கூட்டம் சேருவதை தடுக்க விழிப்புணர்வு நடவடிக்கை மேற்கொள்ளப்பட்டு உள்ளது… அங்குள்ளா ஒரு கடையில் குறிப்பிட்ட நாளில் ஒரு வார்டு மக்கள் மட்டுமே பொருள்களை வாங்க வேண்டும் என விதிமுறை வகுக்கப்பட்டு உள்ளது.

மக்கள் கூடுவதை தவிர்ப்பதற்காக கிராமத்தில் எந்தவொரு திருவிழா, விசே‌ஷங்கள், நிகழ்ச்சிகள், சடங்குகள் எதுவும் நடத்த வேண்டாம் என்று கிராம பொதுமக்கள் ஒன்றாக முடிவு செய்து உள்ளனர்.

கொரோனா தொற்று காலத்தில் பக்கத்து கிராமங்களில் வசிக்கும் உறவினர்களின் விசே‌ஷங்களில் கூட இந்த கிராமத்தினர் கலந்து கொள்வது கிடையாது. இதுபோன்ற கொரோனா தற்காப்பு மற்றும் சுயகட்டுப்பாட்டு நடவடிக்கைகளால் இந்த கிராமத்தை சேர்ந்த அனைவரும் தொற்று பாதிப்பின்றி பாதுகாப்பாக வசித்து வருகின்றனர்.