கருப்பு பூஞ்சை தொற்றாக பரவுமா…? என்ன தடுப்பு நடவடிக்கைகளை எடுக்கலாம்…?

Read Time:5 Minute, 52 Second

கொரோனா நோயால் பாதிக்கப்பட்டவர்களுக்கு “மியூகோர்மைகோசிஸ்” என்று கூறப்படும் கருப்பு பூஞ்சை என்ற நோய் பாதிப்பு ஏற்படுவது மேலும் அச்சத்தை அதிகரித்து இருக்கிறது

கருப்பு பூஞ்சை பல காலமாகவே இருந்து வருகிறது. மண், அழுகிப்போன மரம், இலைகள் ஆகியவற்றில் இந்த பூஞ்சைகள் இருக்கும். இந்த பூஞ்சை காற்றில் பறந்து வந்து, வெட்டுக்காயங்கள் வழியாகவும், மூக்கு துவாரங்கள் மூலமாகவும் உடலை தாக்கும் என மருத்துவ நிபுணர்கள் தெரிவிக்கிறார்கள். கருப்பு பூஞ்சை எனக் கூறப்பட்டாலும் உண்மையில் இதன் நிறம் வெள்ளையாக தான் இருக்கும்.

உடல் பகுதியில் ஒரு இடத்தை தாக்கி, அதனை அழுகும் நிலைக்கு கொண்டு சென்று, அந்த பகுதியில் கருப்பாக மாறிவிடும் கொடூரமான தன்மையை கொண்டதால் கருப்பு பூஞ்சை என்று அழைக்கப்படுகிறது.

அறிகுறிகள் என்ன?

இந்த நோய் பாதிப்பு ஏற்படுபவர்களுக்கு தொண்டையில் கெட்டிச்சளி, மூக்கடைப்பு, தலைவலி போன்றவை ஆரம்பகட்ட அறிகுறியாக இருக்கும்.

இதனை கவனிக்காமல் விடும் பட்சத்தில் கண் பகுதியை பாதிக்கிறது. முதலில் கண் இமை பகுதியை தாக்குகிறது. கண் சிவப்பது மற்றும் வீக்கத்துடன் இருப்பது; இரட்டை பார்வையாக தெரிவது போன்ற அறிகுறிகள் இந்த நோய் பாதிப்பு உள்ளவர்களுக்கு இருக்கும். இந்த கட்டத்தை தாண்டிய பின்னர் பார்வை நரம்புகளை அழுகச் செய்யும் கொடூரமான விளைவை ஏற்படுத்துகிறது. இதனால் பார்வையிழப்பு நேரிடுகையில் சில நாட்களில் மூளைப்பகுதிகளையும் தாக்கும் நோய் மூளைக்காய்ச்சலை ஏற்படுத்தி மரணத்தை விளைவிக்கிறது.

யாருக்கெல்லாம் பாதிப்பு ஏற்பட வாய்ப்பு….?

இந்த கருப்பு பூஞ்சை நோய், நோய் எதிர்ப்பு சக்தி குறைவானவர்களைத்தான் தாக்குகிறது என தெரிவிக்கப்பட்டு உள்ளது.

தற்போது கொரோனா தொற்றால் பாதிக்கப்பட்டவர்களில் பலர் நோய் எதிர்ப்பு சக்தியை இழந்து இருப்பார்கள். அப்படியிருக்கையில் இந்த நோய் தொற்று ஏற்படுகிறது. எனவே கொரோனா தொற்றால் பாதிக்கப்பட்டு நீண்ட நாள் சிகிச்சையில் இருந்தவர்கள் 2 முதல் 3 மாதங்கள் வரை பாதுகாப்பாக இருப்பது நல்லது என மருத்துவர்கள் கேட்டுக் கொள்கிறார்கள்.

நோய் எதிர்ப்பு சக்தி குறைவானவர்கள், ஸ்டீராய்டு மருந்து தொடர்ச்சியாக எடுப்பவர்கள், வயதானவர்கள், நீரிழிவு நோய் பாதிப்பு அதிகளவில் இருப்பவர்களுக்கு இந்த பாதிப்பு அதிகளவில் இருக்கக்கூடும் என தெரிவிக்கப்படுகிறது. எனவே அவர்கள் தங்களை கவனமாகவும், பாதுகாப்பாகவும் பார்த்து கொள்ள வேண்டும் என மருத்துவ துறை வல்லுநர்கள் அறிவுறுத்துகிறார்கள்.

இந்த நோய் வயது வித்தியாசம் பார்ப்பது கிடையாது மற்றும் அனைத்து தரப்பினரும் இதனால் பாதிக்கப்பட வாய்ப்பு உள்ளது என்பது குறிப்பிடத்தக்கது.

கொரோனா போன்று தொற்றாக பரவுமா?

இந்த நோய் ஒருவரிடம் இருந்து மற்றொருவருக்கு பரவாது என்று தெளிவாக தெரிவிக்கப்பட்டு இருக்கிறது. மண், அழுகிப்போன மரங்கள், இலைகள் ஆகியவற்றில் இருந்து காற்றின் மூலம் பரவுகிறது.

கொரோனா வைரஸை போன்று பரவுவதற்கான வாய்ப்பு இல்லை என்றே மருத்துவ வல்லுநர்கள் தெரிவிக்கிறார்கள்.

சிகிச்சை முறைகள் என்ன?

மூக்கடைப்பு, தொண்டையில் கெட்டிச்சளி போன்ற ஆரம்ப அறிகுறி இருந்தால் ‘பயாப்சி’ சோதனை செய்து கொள்ள வேண்டும். கருப்பு பூஞ்சை பாதிப்பா என்பதை உறுதி செய்ய வேண்டும். பூஞ்சை பாதிப்பு உறுதி செய்துவிட்டால், ஊசி, மருந்து மூலமாக சரிசெய்யலாம்.. கருப்பு பூஞ்சை ஒரு இடத்தில் பாதிப்பை ஏற்படுத்திவிட்டால், அந்த பகுதியை அறுவை சிகிச்சை மூலமாகவே அகற்ற முடியும் என மருத்துவர்கள் தெரிவிக்கிறார்கள். இந்த நோய்க்கு காது, மூக்கு, தொண்டை (இ.என்.டி.) நிபுணர்கள், கண் மருத்துவர்கள், நரம்பியல் மருத்துவர்கள் மற்றும் பொது மருத்துவர்கள் அணுகி சிகிச்சை பெறலாம்.

என்ன தடுப்பு நடவடிக்கைகளை எடுக்கலாம்…?

  • வீட்டைச்சுற்றி இருக்கும் சுற்றுப்புற வளாகப் பகுதிகளை நாம் எப்போதும் சுத்தமாக வைத்திருக்க வேண்டும்.
  • 3 மாதம் வரையிலாவது தேவையின்றி வெளியில் செல்லாமல் வீட்டில் இருக்கலாம்.
  • கொரோனாவில் இருந்து பாதுகாக்க முகக்கவசம் அணிவது போன்று, இதற்கும் முககவசத்தை அணிவது அவசியமாகும்.
  • நோய் எதிர்ப்பு சக்தியை அதிகரிக்க கூடிய உணவு வகைகளை அதிகளவில் சாப்பிடுவதன் மூலம் இந்த நோயை கட்டுப்படுத்த முடியும் என மருத்துவர்கள் அறிவுறுத்துகிறார்கள்.