காரியங்களை கைகூடச் செய்யும் கடற்கரை திருத்தலங்கள்…

Read Time:6 Minute, 46 Second

திருச்செந்தூர் செந்திலாண்டவர் கோவில்

திருச்செந்தூர் செந்திலாண்டவர் திருக்கோவில் முருகப்பெருமானின் அறுபடை வீடுகளில் இரண்டாவது திருத்தலமாகும். இங்குதான் சூரபதுமனை எதிர்த்து போரிட்டு முருகப்பெருமான் வென்றார் என்கிறது தல வரலாறு. கோவிலில் முருகப்பெருமான் சுப்பிரமணியர், சண்முகநாதர் என்ற பெயரில் இரண்டு சன்னிதிகளில் அருள்பாலிக்கிறார்.

வள்ளிக்கு தனியாக குகை ஒன்றில் சன்னிதி இருக்கிறது. முருகப்பெருமானுக்கு கடற்கரையோரம் அமைந்த ஒரே தலம் எனச் சொல்லப்படுகிறது.

ராமேசுவரம் ராமநாதர் கோவில்

ராமேசுவரம் ராமநாதர் கோவில் ராமாயணத்தோடு தொடர்புடைய ஆலயமாக பார்க்கப்படுகிறது. கடற்கரையோரமாக அமைந்திருக்கும் இந்தக் கோவிலில் சீதாதேவி மணலால் வடித்த சிவலிங்கம், ராம நாதர் என்ற பெயரில் உள்ளது. மேலும் ஆஞ்சநேயர் காசியில் இருந்து கொண்டு வந்த சிவலிங்கமும் காசி விஸ்வநாதர் என்ற திருநாமத்துடன் அழைக்கப்பட்டு பூஜிக்கப்படுகிறது.

ராமபிரான், தன்னுடைய மனைவி சீதாதேவியோடு இணைந்து இந்த ஆலயத்தில் சிவபெருமானை வழிபாடு செய்திருக்கிறார் என்கிறது தல வரலாறு.

உவரி சுயம்புலிங்க சுவாமி கோவில்

தென் மாவட்டங்களில் உள்ள பிரசித்தி பெற்ற சிவாலயங்களில் நெல்லை மாவட்டம் உவரி சுயம்புலிங்க சுவாமி கோவிலும் ஒன்றாகும். திருச்செந்தூரில் இருந்து 35 கிலோமீட்டர் தூரத்தில் உள்ளது உவரி சுயம்புலிங்க சுவாமி திருக்கோவில். இத்தல இறைவன் சுயம்புவாக தோன்றியதால் சுயம்புலிங்கம் என்று பெயரில் அழைக்கப்படுகிறார். அம்பாளின் திருநாமம் பிரம்மசக்தி அம்மன் என்பதாகும். கடல், தெப்பக்குளம், கருவறை லிங்கம் ஆகிய மூன்றும், ஒரே நேர் கோட்டுப் பார்வையில் அமைந்துள்ள புண்ணியத் தலமாகும்.

உவரி சுயம்புலிங்க சுவாமியை வழிபட வரும் பக்தர்களுக்கும் சந்தனத்தை மேனி எங்கும் பூசுவதற்கு கொடுக்கின்றனர். சுவாமியின் திருமேனியில் தினமும் சந்தனத்தை அரைத்து பூசுகின்றனர். தீராத நோய் உள்ளவர்களும், காய்ச்சலால் பாதிக்கப்பட்டவர் களும் சந்தனத்தை மருந்தாக்கி நலம் பெறுகின்றனர். சந்தனம் மற்றும் விபூதியை தண்ணீரில் கலந்து அருந்துகிறார்கள்.

கன்னியாகுமரி பகவதி அம்மன் கோவில்

உலக புகழ்பெற்ற கோவில்களில் கன்னியாகுமரி பகவதி அம்மன் கோவிலும் ஒன்று.

மூன்று கடல்கள் சங்கமிக்கும் இடத்தில் அமைந்திருப்பதால் இந்த கோவில் மிகுந்த சிறப்பை பெறுகிறது. கன்னியாகுமரியில் இருக்கும் இந்த ஆலயத்தில் உள்ள அம்மன், திருமணம் ஆகாமல் கன்னியாக இருப்பதால் குமரி அம்மன் என்ற நாமத்துடன் அழைக்கப்படுகிறார். இந்த திருத்தலம் சக்தி பீடத் தலங்களில் ஒன்றாகும். பாணாசுரன் என்ற அரக்கனை அம்பாள் அழித்த தலம் கன்னியாகுமரியாகும்.

திருவான்மியூர் மருந்தீஸ்வரர் கோவில்

சென்னை திருவான்மியூரில் அமைந்துள்ளது மருந்தீஸ்வரர் கோவில். சுமார் 2 ஆயிரம் ஆண்டுகள் பழமையான கோவிலில் இறைவனின் பெயர், ‘மருந்தீஸ்வரர்’. ஒளசதநாதர், பால்வண்ணநாதர் என்ற நாமத்துடனும் இறைவனை அழைக்கிறார்கள். அகத்தியருக்கு இத்தல இறைவன், வன்னி மரத்தடியில் காட்சி கொடுத்தார் என்பது வரலாறு.

அதோடு அவருக்கு உலகில் தோன்றும் நோய்களுக்கான மருந்துகளைப் பற்றியும், மூலிகைகளின் தன்மை பற்றியும் உபதேசம் செய்தார். இதன் காரணமாகவே இறைவனுக்கு மருந்தீஸ்வரர் என்ற திருநாமம் வந்தது. அம்பாளின் திருநாமம் திரிபுரசுந்தரி, சவுந்திரநாயகி என்பதாகும்.

நாகை காயாரோகணேஸ்வரர் கோவில்

நாகப்பட்டினத்தில் அமைந்துள்ளது காயாரோகணேஸ்வரர் கோவில்…

கோவிலில் இறைவன் காயாரோகணேஸ்வரர் என்றும், அம்பாள் நீலாயதாட்சி என்றும் அழைக்கப்படுகிறார்கள். மதுரை மீனாட்சி அம்மன் கோவிலை போன்று இத்தலமும் அம்பாளை முன்னிலைப்படுத்தும் திருத்தலமாக உள்ளது. புண்டரீகர் என்னும் முனிவர் முக்தி வேண்டி இத்தல இறைவனை நோக்கி தவம் இருந்த போது, இறைவன் முனிவரை ஆரத்தழுவி முக்தியை வழங்கினார் என்பது வரலாறு.

இதன் காரணமாகத்தான் இத்தல இறைவனுக்கு காயாரோகணேஸ்வரர் என்ற திருநாமம் வந்தது. இங்கு தல விருட்சமாக மாமரம் உள்ளது. இந்த மரத்தில் உள்ள பழமானது, இனிப்பு, புளிப்பு, துவர்ப்பு ஆகிய மூன்று சுவைகளுடன் இருக்கிறது. இந்த மாமரத்தை கோவிலின் தென்கிழக்குப் பகுதியில் இருந்து பார்த்தால், நந்தி வடிவத்தில் காட்சியளிப்பது தனிச்சிறப்பு.

சென்னை அஷ்டலட்சுமி கோவில்

சென்னை பெசன்ட் நகரில் எலியட்ஸ் கடற்கரையில் இருக்கிறது அஷ்டலட்சுமி கோவில்.

மொத்தம் நான்கு தளங்களால் அமைக்கப்பட்டு உள்ள கோவிலில், முதல் தளத்தில் ஆதிலட்சுமி, தான்யலட்சுமி, வீரலட்சுமி தேவியர்கள் அருள்காட்சி தருகின்றனர். இரண்டாவது தளத்தில், திருமகளுடன் திருமால் திருமணக் கோலத்தில் பக்தர்களுக்கு தரிசனம் தருகிறார். இந்த திருமணக் கோலத்தை வழிபட்ட பிறகே, பிற தெய்வங்களை வழிபட வேண்டும் என்ற வழக்கம் கோவிலில் நடைமுறையில் உள்ளது. மேலும் மூன்றாவது தளத்தில் சந்தான லட்சுமி, விஜயலட்சுமி, வித்யாலட்சுமி, கஜலட்சுமி ஆகிய தேவியர்கள் வீற்றிருக்கின்றனர். நான்காவது தளத்தில் தனலட்சுமி தாயார் தன்னை நாடிவரும் பக்தர்களுக்கு அருள்பாலிக்கிறார்.