தடுப்பூசிகளால் நோய் எதிர்ப்பு சக்தி அதிகரிப்பு….

Read Time:2 Minute, 56 Second

தடுப்பூசிகள், இயற்கையான நோய் எதிர்ப்பு சக்தியை அதிகரிக்கும் என்று ஆய்வு முடிவுகளில் தெரியவந்துள்ளது.

கொரோனா வைரஸ் தொற்றை ஒழித்துக்கட்டுவதில் தடுப்பூசிகளுக்கு மிக முக்கியமான பங்கு இருக்கிறது.

அமெரிக்காவின் ராக்கெல்லர் பல்கலைக்கழக ஆராய்ச்சியாளர்கள் கொரோனா தொற்று நோயாளிகளின் ரத்தத்தில் உள்ள நோய் எதிர்ப்பு பொருளை (ஆன்டிபாடிஸ்) ஆய்வு செய்து, மூலக்கூறுகளின் பரிணாமத்தை கண்காணித்து உள்ளனர்.

இந்த ஆய்வில் கடந்த ஆண்டின் வசந்த காலத்தில் கொரோனா தொற்றுக்கு உள்ளான 63 பேர் பயன்படுத்தப்பட்டு உள்ளனர்.

அவர்களை கண்காணித்து வந்ததில், நோய் எதிர்ப்பு மண்டலத்தின் மெமரி ‘பி’ செல்களால் உற்பத்தி செய்யப்படும் நோய் எதிர்ப்பு பொருள், கொரோனா தொற்றை ஏற்படுத்தும் சார்ஸ் கோவ்-2 வைரசை வீழ்த்துவதில் சிறப்பாக பணியாற்றுவது தெரிய வந்து இருக்கிறது என தெரிவிக்கப்பட்டு உள்ளது.

மெமரி பி செல்கள், நோய் எதிர்ப்பு தேக்கம் போல செயல்படுகின்றன என்றும் இது நோய் எதிர்ப்பு பொருளின் மாறுபட்ட தொகுப்பை கொண்டுள்ளது என்றும் ஆய்வு முடிவில் தெரிவிக்கப்பட்டுள்ளது.

இந்த ஆய்வில், பயன்படுத்தப்பட்டுள்ள மக்கள் கொரோனா வைரசுக்கு எதிராக மேம்பட்ட நீண்ட கால பாதுகாப்பை வளர்த்துக்கொண்டிருப்பதும் தெரியவந்து இருக்கிறது.

மாடர்னா அல்லது பைசர் தடுப்பூசியின் ஒருடோஸ்-ஐ போட்டுக்கொண்ட நபர்களிடையே இந்த நோய் எதிர்ப்பு சக்தி இயல்பாக மேலும் அதிகரித்து இருப்பதை ஆராய்ச்சியாளர்கள் கண்டுபிடித்து உள்ளனர்.

இவர்களின் உடல்களில் உருவான நோய் எதிர்ப்பு சக்தி பொருள், உருமாறிய கொரோனா வைரசுக்கு எதிராக வலுவாக விளங்குகின்றன என்றும் தெரிவிக்கப்பட்டுள்ளது. குறிப்பாக இங்கிலாந்து, தென் ஆப்பிரிக்காக, அமெரிக்காவில் கண்டறியப்பட்ட உருமாறிய கொரோனா வைரசுக்கு எதிராக செயல்படுகின்றன என்பது கண்டுபிடிக்கப்பட்டு உள்ளது.

தற்போதைய தடுப்பூசிகளுடன் பூஸ்டர்கள் சேர்கிறபோது, அது ஒரு போதும் கொரோனா வைரஸ் தொற்றுநோயைப் பெறாதவர்களுக்கு கூடுதல் பாதுகாப்பை அளிக்கக்கூடும் என்றும் இந்த ஆய்வு காட்டுகிறது.