பிரதமர் இல்லத்தில் மாணவியின் கொய்யா கன்று…

Read Time:2 Minute, 2 Second

டெல்லியில் பிரதமரின் அரசு இல்லத்தில் கேரள மாணவி இயற்கை முறையில் வளர்த்த ஜெயலட்சுமி வழங்கிய கொய்யா மரக்கன்று நடப்படுகிறது.

அண்மையில் டெல்லி சென்றிருந்த பாஜக எம்.பி.யும், மலையாள நடிகருமான சுரேஷ் கோபி, பிரதமர் நரேந்திர மோடியை சந்தித்து கொய்யா மரக்கன்று ஒன்றை பரிசாக அளித்தார்.

இந்த மரக்கன்று கேரளாவில் பத்தாம் வகுப்பு படிக்கும் ஜெயலட்சுமி என்ற மாணவி வழங்கிய கொய்யா மரக்கன்றாகும். இயற்கையான முறையில் செடிகளை வளர்க்கும் மாணவி ஜெயலட்சுமி, கேரளாவில் சிறந்த மாணவிக்கு அளிக்கப்படும் ‘கர்ஷக திலகம்’ என்ற விருதை பெற்றவர்.

பிரதமர் மோடிக்கு கொய்யா மரக்கன்றை பரிசாக வழங்கிய நடிகர் சுரேஷ் கோபி தன்னுடைய டுவிட்டர் பகுதியில் வெளியிட்டுள்ள செய்தியில், கேரளாவில் 10 ஆம் வகுப்பு படிக்கும் ஜெயலட்சுமி என்ற மாணவி வழங்கிய கொய்யா மரக்கன்று பரிசை டெல்லி சென்று பிரதமரிடம் ஒப்படைத்தேன்.
கேரளாவின் பத்தனம்திட்டாவில் குளநாடா கிராமத்தை சேர்ந்த அறிவாற்றல் மிக்க இளம் மாணவி ஜெயலட்சுமி வளர்த்த மரக்கன்று பிரதமரின் அதிகாரப்பூர்வ இல்லத்தில் நடப்படவுள்ளது எனக் குறிப்பிட்டுள்ளார்.

பிரதமரின் அதிகாரப்பூர்வ இல்லத்தில் மரக்கன்று நடப்படும் என பிரதமர் மோடி என்னிடம் உறுதி அளித்தார் எனவும் சுரேஷ் கோபி கூறியுள்ளார்.

மேலும் கொய்யா மரக்கன்றை பிரதமர் மோடியிடம் வழங்குவது போன்ற புகைப்படத்தையும் நடிகர் சுரேஷ் கோபி, தனது பேஸ்புக், ட்விட்டர் பக்கங்களில் வெளியிட்டு உள்ளார்.